بۇقتىرما سۋ قويماسى ارقىلى وتەتىن كوپىردىڭ قۇرىلىسىن جۇرگىزگەن «وبلشىعىسجول» كومپانياسىنىڭ قانشا تەڭگە پايدا تاپقانى جاريالاندى، دەپ حابارلايدى "ادىرنا" ۇلتتىق پورتالى كۋرسيۆكە سىلتەپ.
باق-تاراعان مالىمەتتە كومپانيانىڭ 2024 جىلى 2,7 ميلليارد تەڭگە تازا پايدا تاپقانى كورسەتىلگەن. بۇل كورسەتكىش 2023 جىلعى 220 ميلليون تەڭگەمەن سالىستىرعاندا 12 ەسەدەن استام وسكەن.
«وبلشىعىسجول» شىعىس قازاقستان وبلىسىندا تىركەلگەن. كومپانيانىڭ جالعىز يەسى — «ەلحون» جشس، ونىڭ قۇرىلتايشىلارى جانبولات قازانوۆ پەن ساۋلە تۇماشينوۆا. ول — ءماجىلىس دەپۋتاتى لۇكبەك تۇماشينوۆتىڭ جۇبايى.
2025 جىلدىڭ تامىز ايىندا كومپانيا باسشىسى جانبولات قازانوۆ كولىك سالاسىنىڭ دامۋىنا قوسقان ۇلەسى ءۇشىن پرەزيدەنت قاسىم-جومارت توقاەۆتىڭ جارلىعىمەن «بارىس» ءىى دارەجەلى وردەنىمەن ماراپاتتالعان.
قارجىلىق ەسەپكە سايكەس، كومپانيانىڭ جالپى تابىسى 2024 جىلى 32,2 ميلليارد تەڭگەگە جەتكەن (2023 جىلى — 20 ميلليارد تەڭگە).
ايتا كەتەيىك، 2019 جىلدىڭ 19 قىركۇيەگىندە پرەزيدەنت قاسىم-جومارت توقاەۆ ۇكىمەت پەن شىعىس قازاقستان وبلىسىنىڭ اكىمدىگىنە بۇقتىرما سۋ قويماسى ارقىلى كوپىر سالۋ جوباسىن قولعا الۋدى تاپسىرعان ەدى.
سول ۋاقىتقا دەيىن ءوڭىردىڭ جەتى اۋدانىنىڭ (كۇرشىم، تارباعاتاي، زايسان، مارقاكول، التاي، ۇلكەن نارىن جانە كاتونقاراعاي) تۇرعىندارى جاز ايلارىندا ەسكى پاروم قىزمەتىن پايدالانسا، قىس كەزىندە مۇز ۇستىمەن جۇرۋگە ءماجبۇر بولعان.
جەرگىلىكتى اكىمدىك مالىمەتىنشە، مۇزدىڭ وپىرىلۋى سالدارىنان سوڭعى ونداعان جىلدا شامامەن 300 ادام كوز جۇمعان.
2020 جىلدىڭ اقپانىندا وبلىستىق جولاۋشىلار كولىگى جانە اۆتوجولدار باسقارماسىنىڭ باسشىسى نۇرجان ءجۇمادىلوۆ كوپىر قۇرىلىسىنىڭ رەسمي تۇردە باستالعانىن مالىمدەگەن.
جوبانىڭ باستاپقى قۇنى 30,2 ميلليارد تەڭگە بولىپ بەكىتىلىپ، ونىڭ 90 پايىزى رەسپۋبليكالىق، 10 پايىزى وبلىستىق بيۋدجەتتەن بولىنگەن. كەيىن بۇل سوما 61 ميلليارد تەڭگەگە دەيىن ۇلعايعان.
2024 جىلدىڭ قازان ايىندا «وبلشىعىسجول» كومپانياسى ۇزىندىعى 1316 مەتر، ەنى 13 مەتر بولاتىن ەكى جولاقتى كوپىردى پايدالانۋعا بەردى.
