تىلدەر مەرەكەسىنە وراي ۇلىتاۋ وبلىستىق تىلدەردى دامىتۋ باسقارماسىنىڭ ۇيىمداستىرۋىمەن مەملەكەتتىك قىزمەتشىلەر اراسىندا «تىلدەسەر» اتتى وبلىستىق بايقاۋ ءوتتى.
بايقاۋدىڭ نەگىزگى ماقساتى – مەملەكەتتىك ءتىلدىڭ قولدانىس اياسىن كەڭەيتۋ، ونى جەتىك مەڭگەرگەن وزگە ۇلت وكىلدەرىن ىنتالاندىرۋ جانە مەملەكەتتىك قىزمەتشىلەر اراسىندا ءتىل مادەنيەتىن ناسيحاتتاۋ بولىپ تابىلادى.
ءىس-شاراعا ءوڭىردىڭ ءتۇرلى مەملەكەتتىك مەكەمەلەرىنەن قىزمەتكەرلەر قاتىسىپ، وزدەرىنىڭ قازاق ءتىلىن مەڭگەرۋ دەڭگەيىن، سويلەۋ مادەنيەتىن جانە شىعارماشىلىق قابىلەتتەرىن كورسەتتى.
ۇلىتاۋ وبلىسىنىڭ پوليتسيا دەپارتامەنتىنەن بايقاۋعا پوليتسيا قىزمەتكەرى شامحات ساۆرانتاەۆ قاتىسىپ، مەملەكەتتىك ءتىلدى جەتىك مەڭگەرگەنىن دالەلدەپ، ۇزدىك قاتىسۋشىلاردىڭ ءبىرى اتاندى.
بۇگىندە پوليتسيا دەپارتامەنتىندە جيىرماعا جۋىق وزگە ۇلت وكىلدەرى قىزمەت اتقارىپ، ءوز ەڭبەكتەرىمەن قوعامدىق ءتارتىپ پەن قاۋىپسىزدىكتى قامتاماسىز ەتۋگە ۇلەس قوسىپ كەلەدى. ولار مەملەكەتتىك ءتىلدى قۇرمەتتەپ، كۇندەلىكتى قىزمەتىندە دە كەڭىنەن قولدانۋدا.
وسىنداي ءىس-شارالار مەملەكەتتىك قىزمەتشىلەردىڭ تىلگە دەگەن قۇرمەتىن ارتتىرىپ قانا قويماي، ءتۇرلى ەتنوس وكىلدەرى اراسىندا دوستىق پەن ءوزارا تۇسىنىستىكتى نىعايتۋعا دا ۇلەس قوسادى.
