فوتو: Anna Moneymaker/Getty Images
اقش-تىڭ بۇرىنعى ۇلتتىق قاۋىپسىزدىك جونىندەگى كەڭەسشىسى دجون بولتونعا فەدەرالدىق دەڭگەيدە قۇپيا اقپاراتتى زاڭسىز جاريالاۋ ءىسى بويىنشا رەسمي ايىپ تاعىلدى. ول دونالد ترامپتىڭ العاشقى پرەزيدەنتتىك مەرزىمىندە قىزمەت ەتىپ، كەيىننەن ونىڭ اشىق سىنشىسى بولعان ساياساتكەر رەتىندە بەلگىلى، دەپ حابارلايدى "ادىرنا".
اقش ادىلەت مينيسترلىگىنىڭ حابارلاۋىنشا، بولتوننىڭ ءىسى مەريلەندتەگى ۇلكەن القابيلەر سوتىنا جولدانعان. سوت القاسى ايىپ تاعۋعا جەتكىلىكتى دالەل بار دەپ شەشىم قابىلداعان.
بولتون سوڭعى اپتالاردا ايىپ تاعىلعان ءۇشىنشى ترامپ قارسىلاسى بولىپ وتىر. بۇعان دەيىن وسىنداي ايىپتار فبر-ءدىڭ بۇرىنعى ديرەكتورى دجەيمس كومي مەن نيۋ-يورك شتاتىنىڭ باس پروكۋرورى لەتيتسيا دجەيمسكە دە تاعىلعان ەدى.
تامىز ايىندا فبر اگەنتتەرى دجون بولتوننىڭ ءۇيى مەن كەڭسەسىندە ءتىنتۋ جۇرگىزىپ، قۇجاتتارمەن جۇمىس ىستەۋ تارتىبىنە بايلانىستى ماتەريالدار جيناعان.
ساياساتكەر وزىنە تاعىلعان ايىپتاردى مويىندامايدى. ونىڭ ادۆوكاتى ەببي لوۋەللدىڭ ايتۋىنشا، بولتون بارلىق قۇجاتتارمەن زاڭعا ساي ارەكەت ەتكەن.
ەگەر بولتوننىڭ كىناسى دالەلدەنسە، ول ۇزاق مەرزىمگە باس بوستاندىعىنان ايىرىلۋى مۇمكىن.
