موڭعوليانىڭ كونستيتۋتسيالىق سوتى ۇلى مەملەكەتتىك حۋرالدىڭ 2025 جىلعى 17 قازاندا قابىلداعان №95 قاۋلىسى ەل كونستيتۋتسياسىنا قايشى ەكەنىن مالىمدەدى، دەپ حۆبارلايدى "ادىرنا" ۇلتتىق پورتالى.
22 قازاندا وتكەن وتىرىستا سوت پارلامەنت توراعاسىنىڭ ورىنباسارى حۋرەلبااتار بۋلگانتۋياانىڭ ارەكەتتەرى مەن پرەمەر-ءمينيستردى قىزمەتىنەن بوساتۋ تۋرالى قاۋلىنىڭ زاڭدىلىعىن قارادى. ناتيجەسىندە، بۋلگانتۋياا حانىمنىڭ ۇلى مەملەكەتتىك حۋرالدىڭ جالپى وتىرىسىنا توراعالىق ەتۋى كەزىندە كونستيتۋتسيانىڭ 1.2 جانە 43.1-باپتارى بۇزىلعانى انىقتالدى.
اتالعان باپتاردا مەملەكەتتىك بيلىكتىڭ باستى ماقساتى — دەموكراتيا مەن زاڭ ۇستەمدىگىن قامتاماسىز ەتۋ ەكەنى جانە پرەمەر-ءمينيستردىڭ وتستاۆكاسىنا بايلانىستى ماسەلە ءۇش كۇن ىشىندە قارالىپ، ون كۇن ىشىندە شەشىلۋى ءتيىس ەكەنى جازىلعان.
كونستيتۋتسيالىق سوتتىڭ شەشىمىندە ۇلى مەملەكەتتىك حۋرالدىڭ پرەمەر-ءمينيستردى قىزمەتىنەن بوساتۋ تۋرالى №95 قاۋلىسى كونستيتۋتسيانىڭ 1.2, 43.1 جانە 70.1-باپتارىنا قايشى كەلەتىنى اتاپ ءوتىلدى. 70.1-باپقا سايكەس، مەملەكەتتىك ورگانداردىڭ بارلىق زاڭدارى مەن شەشىمدەرى، سونداي-اق ازاماتتار مەن ۇيىمداردىڭ قىزمەتى كونستيتۋتسياعا تولىق سايكەس بولۋى قاجەت.
بۇعان دەيىن، موڭعوليانىڭ پارلامەنتتىك وتىرىسىندا پرەمەر-مينيستر گومبوجاۆىن زاندانشاتارىنىڭ وتستاۆكاسى تۋرالى ۇسىنىس قارالىپ، ءتيىستى قاۋلى قابىلدانعانى تۋرالى جازعان ەدىك.
