ۆەنگريا پارلامەنتى پرەمەر-مينيستر پەتەر مادياردىڭ جانە ۆيكتور وربان ۇكىمەتىندە قىزمەت اتقارعان ەكى بۇرىنعى ءمينيستردىڭ قول سۇعىلماۋشىلىق قۇقىعىن الىپ تاستادى. بۇل شەشىم ولاردىڭ ۇستىنەن جۇرگىزىلىپ جاتقان قىلمىستىق ىستەر بويىنشا تەرگەۋدى جالعاستىرۋعا مۇمكىندىك بەرەدى، دەپ حابارلايدى "ادىرنا" پورتالى ۆۆس-گە سىلتەپ.
Associated Press مالىمەتىنشە، دەپۋتاتتاردىڭ باسىم بولىگى مادياردىڭ، بۇرىنعى مادەنيەت ءمينيسترى بالاش حانكونىڭ جانە بۇرىنعى ۇلتتىق دامۋ ءمينيسترى ميكلوش شەشتاكتىڭ قول سۇعىلماۋشىلىق قۇقىعىن الىپ تاستاۋدى قولداعان.
ماديارعا 2024 جىلعى ماۋسىمدا بولعان وقيعاعا بايلانىستى ۇرلىق جاسادى دەگەن كۇدىك كەلتىرىلگەن. تەرگەۋ نۇسقاسى بويىنشا، ول ءوزىن ۆيدەوعا ءتۇسىرىپ تۇرعان ادامنىڭ تەلەفونىن الىپ، دۋنايعا لاقتىرعان. پرەمەر-مينيستر بۇل ارەكەتتى جوققا شىعارمايدى، بىراق ونى ۇرلىق دەپ باعالاۋعا بولمايتىنىن ايتىپ، ءىستىڭ ساياسي استارى بار ەكەنىن مالىمدەدى. سونىمەن قاتار ول وزىنە قاتىستى قولسۇعىلماۋشىلىقتى الىپ تاستاۋدى ءوزى سۇراعان.
ال بۇرىنعى مينيسترلەر بالاش حانكو مەن ميكلوش شەشتاكقا قاتىستى ىستەر ۆيكتور وربان بيلىگى كەزىندەگى ىقتيمال زاڭبۇزۋشىلىقتاردى تەرگەۋمەن بايلانىستى.
حانكو ۇلتتىق مادەني قوردىڭ 17,3 ملرد فورينت قاراجاتىن ماقساتسىز پايدالانۋعا قاتىسى بار دەگەن كۇدىككە ءىلىندى. ال شەشتاك 2014–2018 جىلدارى مينيستر بولعان كەزەڭدە پارا الدى دەگەن كۇدىكپەن تەرگەلىپ جاتىر. ەكەۋى دە وزدەرىنە تاعىلعان ايىپتاردى مويىندامايدى.
«فيدەس» پارتياسى مەن ونىڭ كواليتسيالىق سەرىكتەسى حريستيان-دەموكراتيالىق حالىق پارتياسىنىڭ دەپۋتاتتارى داۋىس بەرۋگە قاتىسپادى. ولار بۇرىنعى مينيسترلەرگە قاتىستى ايىپتاردى ساياسي قىسىم دەپ باعالادى.
