وليمپيادا ويىندارىنىڭ كۇمىس جۇلدەگەرى، قازاقستان ۇلتتىق وليمپيادا كوميتەتىنىڭ پرەزيدەنتى جانە World Boxing وليمپيادالىق كوميسسياسىنىڭ توراعاسى گەننادي گولوۆكين حالىقارالىق بوكس فەدەراتسياسى World Boxing ۇيىمىنىڭ پرەزيدەنتى لاۋازىمىنا ءوز كانديداتۋراسىن ۇسىندى، دەپ حابارلايدى "ادىرنا" ۇلتتىق پورتالى.
گولوۆكين Instagram پاراقشاسىندا:
“مەن ماڭىزدى شەشىم قابىلدادىم – World Boxing حالىقارالىق فەدەراتسياسىنىڭ پرەزيدەنتى قىزمەتىنە ءوز كانديداتۋرىمدى ۇسىندىم. مەنىڭ ميسسيام – بوكستىڭ وليمپيادالىق بولاشاعىن ساقتاۋ، سەنىمدى نىعايتۋ جانە سپورتشىلار مەن جاتتىقتىرۋشىلاردى قولداۋ. ءبىزدىڭ ماقساتىمىز حالىقارالىق وليمپيادا كوميتەتىنىڭ تولىق مويىنداۋىنا قول جەتكىزۋ جانە بوكستىڭ وليمپيادا ويىندارىنداعى ورنىن ساقتاۋ”، — دەپ جازدى.
World Boxing حابارلاۋىنشا، سايلاۋعا 16 ەلدەن 17 ۇمىتكەر قاتىسادى، ولاردىڭ ىشىندە ءارتۇرلى باسقارۋشىلىق لاۋازىمدارعا تۇسەتىندەر دە بار.
پرەزيدەنتتىككە تەك ەكى ۇمىتكەر تىركەلگەن. ولار گەننادي گولوۆكين (قازاقستان) جانە ماريوليس حاريلاوس (گرەكيا).
قازىرگى پرەزيدەنت بوريس ۆان دەر ۆورست بيىلعى قىركۇيەكتە ەكىنشى مەرزىمگە سايلاۋعا تۇسپەيتىنىن مالىمدەگەن.
سايلاۋ 2025 جىلدىڭ 23 قاراشاسىندا ريم قالاسىندا وتەتىن World Boxing-ءتىڭ جىل سايىنعى كونگرەسىندە وتەدى.
World Boxing ۇيىمى 2023 جىلى ءساۋىر ايىندا قۇرىلعان. ونىڭ ماقساتى –حالىقارالىق وليمپيادا كوميتەتىمەن ىنتىماقتاستىق ورناتىپ، بوكستى وليمپيادالىق باعدارلاماعا قايتارۋ.
2025 جىلعى 25 اقپاندا حوك ۇيىمدى ۋاقىتشا مويىنداپ، ونى الەمدىك دەڭگەيدە بوكستى باسقارۋشى حالىقارالىق فەدەراتسيا رەتىندە تانىعان.
