تەرگەۋ يزولياتورىندا وتىرعان بەلگىلى كاسىپكەر الماسبەك سادىرباي پرەزيدەنت قاسىم-جومارت توقاەۆقا ۇندەۋ جولدادى، دەپ حابارلايدى «ادىرنا» ءتىلشىسى قازتاگ-قا سىلتەمە جاساپ.
ء«بىر جىل بويى قاماۋدا وتىرمىن. وسى ۋاقىت ىشىندە وڭ وزگەرىس بولادى دەپ ۇمىتتەنىپ، ەشقايدا شاعىمدانبادىم، شىدادىم. مەنى 10 رەت ءارتۇرلى تەرگەۋ يزولياتورلارىنا اۋىستىردى. تەرگەۋ مەرزىمى اياقتالار كۇنى تەرگەۋ توبى ىسكە «ۇيىمداسقان قىلمىستىق توپقا قاتىسۋ» جانە «مۇلىكتى زاڭداستىرۋ» دەگەن جاڭا باپتاردى قوسىپ، قاماۋ مەرزىمىن تاعى ۇزارتتى»،- دەلىنگەن جاساندى ينتەللەكت كومەگىمەن جاسالعان بەينەۇندەۋدە.
ۇندەۋدە ونىڭ كىناسىن دالەلدەيتىن ەشقانداي ايعاق جوق ەكەنى ايتىلعان. سادىربايدىڭ پىكىرىنشە، ونىڭ قۋدالانۋىنا قوعامدىق بەلسەندىلىگى سەبەپ بولعان. سوڭعى ۋاقىتتا ول فەرمەرلەردىڭ ماسەلەلەرىن, ازىق-تۇلىك قاۋىپسىزدىگى مەن اگروساياساتتاعى كەمشىلىكتەردى ءجيى كوتەرىپ، سىن ايتقان.
«الماتى وبلىسىنىڭ پروكۋراتۋراسى مەنىڭ اتىما قارا كۇيە جاعىپ، بۇقارالىق اقپارات قۇرالدارى ارقىلى الماتىدا التى ەليتالىق پاتەرى بار دەگەن جالعان اقپارات تاراتتى. بۇل شىندىققا جاناسپايدى. مەن راقىمشىلىق ەمەس، ادىلدىك پەن شىندىقتى سۇرايمىن»، — دەلىنگەن ۇندەۋدە.
ەسكە سالايىق، «شاڭىراق» قوعامدىق بىرلەستىگىنىڭ جەتەكشىسى الماسبەك سادىرباي 2024 جىلدىڭ قاراشاسىندا قاماۋعا الىنعان بولاتىن. بۇعان دەيىن پروكۋراتۋرا قىلمىستىق كودەكستىڭ 190-بابى 4-بولىگى 2-تارماعى (اسا ءىرى مولشەردە جاسالعان الاياقتىق) بويىنشا سوتقا دەيىنگى تەرگەپ-تەكسەرۋ جۇرگىزىلىپ جاتقانىن ايتقان ەدى.
