شىمكەنتتە مەملەكەتتىك قىزمەتكەردەن 10 ملن تەڭگە بوپسالادى دەگەن كۇدىكپەن بلوگەر ۇستالدى. بۇل تۋرالى ىشكى ىستەر مينيسترلىگى مالىمدەدى، دەپ حابارلايدى "ادىرنا".
پوليتسيا قىزمەتكەرلەرى جەدەل-ىزدەستىرۋ ءىس-شارالارى بارىسىندا لاۋازىمدى تۇلعادان اقشا بوپسالاعان بلوگەر-ءجۋرناليستى ۇستادى.
الدىن الا مالىمەتكە سايكەس، كۇدىكتى اكىمدىك قىزمەتكەرىنەن 10 ميلليون تەڭگە كولەمىندە اقشا تالاپ ەتكەن. ول بۇل سوماعا الەۋمەتتىك جەلىلەردە مەملەكەتتىك ورگانداردىڭ قىزمەتىن قارالايتىن ماتەريالداردى تاراتپاۋعا ۋادە بەرگەن.
اتالعان جايت بويىنشا قىلمىستىق ءىس قوزعالدى. تەرگەۋ اياسىندا كۇدىكتىنىڭ تۇرعىلىقتى جەرى مەن كەڭسەسىندە ءتىنتۋ جۇرگىزىلىپ، ناتيجەسىندە ەلەكتروندىق قۇرىلعىلار مەن وزگە دە زاتتاي ايعاقتار تاركىلەندى.
كۇدىكتى ۋاقىتشا ۇستاۋ يزولياتورىنا قاماۋعا الىندى. قازىرگى تاڭدا وقيعانىڭ بارلىق ءمان-جايىن انىقتاۋعا باعىتتالعان تەرگەۋ ارەكەتتەرى جۇرگىزىلۋدە.
مەملەكەتتىك قىزمەتكەردەن 10 ملن تەڭگە بوپسالاعان بلوگەر ۇستالدى
07.11.2025
548
ۇقساس جاڭالىقتار
پىكىرلەر
