ونىڭ بولمىسى ەرەكشە. كولگىرسۋ، جاعىمپازدانىپ ءجۇرۋ يا بولماسا ءوزىن ومىردە ەرەكشەلەنىپ كورسەتۋدەن اۋلاق.
بىراق ماماندىعىن جانى سۇيەدى. ساحناداعى جانە كينوداعى رولدەرىنە تىڭعىلىقپەن قارايدى. مەن وقىرمان قاۋىمعا استانا مۋزىكالىق جاس كورەرمەندەر تەاترىنىڭ اكتەرى مۇحامەدسايد باعاشاروۆ تۋرالى ايتپاقپىن. جوعارىداعى مىنەزدەمە اتالمىش جانعا ارنالادى.
مۇحامەدسايد — الماتى وبلىسى ەڭبەكشىقازاق اۋدانىنىڭ تۋماسى. جاستايىنان اقيىق اقىن مۇقاعالي ماقاتاەۆتىڭ جىرلارىن جاتتاپ ءوستى. كوللەدجدى اياقتاعاننان كەيىن ت.جۇرگەنوۆ اتىنداعى قازاق ۇلتتىق ونەر اكادەمياسىنا «مۋزىكالىق تەاتر اكتەرى» ماماندىعىنا وقۋعا تۇسەدى. 3-كۋرستان باستاپ مۇحامەدسايدتىڭ ءومىرى استانا قالاسىندا وتەدى. جاڭادان قۇرىلىپ جاتقان مۋزىكالىق جاس كورەرمەن تەاترىنا اكتەر بولىپ قابىلدانادى. جاس شاڭىراقتىڭ العاشقى قادامدارىنا كۋا بولىپ، تەاتردىڭ بارلىق ىسىنە بەلسەنە ارالاسادى. ءتىپتى تەاتردا تۇنەگەن كەزدەرى دە بولعان
2020 جىلدىڭ 14 جەلتوقسانىندا «اباي – توعجان» شىعارماسىمەن مۋزىكالىق جاس كورەرمەندەر تەاترى وزدەرىنىڭ العاشقى شىمىلدىعىن اشادى. اتالعان تۋىندىدا مۇحامەدسايد قۇنانبايدىڭ سەرىگىن، كەڭەسشىسىن كەيىپتەيدى. بۇل تەاترداعى تۇڭعىش قادامى ەدى.
مۇحامەدسايد — ءار كەيىپكەرىنىڭ تەتىگىن تاباتىن اكتەر. اتالعان سوزىمىزگە م.وماروۆانىڭ ء«شامشى» مۋزىكالىق دراماسىنداعى مۇقاعالي ماقاتاەۆ بەينەسى دالەل. تەاتر ساحناسىندا مۇقاعالي ماقاتاەۆ بەينەسى — قازاق پوەزياسىنىڭ اسقاق رۋحىن، اقىننىڭ ىشكى جان ارپالىسىن، تاعدىرلىق قايشىلىعىن، حالقىنا دەگەن ماحابباتىن تەرەڭنەن تانىتاتىن كۇردەلى ءارى اسەرلى كوركەم وبراز.
كوپتەگەن درامالىق قويىلىمداردا مۇقاعالي ءومىرىنىڭ سوڭعى كەزەڭى، جالعىزدىق، قوعاممەن ۇيلەسە الماي، ءوز شىندىعىن ايتا الماي كۇيزەلگەن ساتتەرى كورىنىس تابادى. ال مۇحامەدسايد نۇسقالاۋىنداعى اقىن بەينەسى — سەرىلىگى مەن تەكتىلىگى قاتار جۇرەتىن ونەر يەسى. ياعني، ءومىرى مۇڭ مەن ارپالىسقا تولى اقىن ەمەس، كەرىسىنشە مۇحامەدسايد شەبەرلىگىنە قاراپ ناعىز ونەر ادامىن كورەمىز. مۇحامەدسايد مۇقاعالي ويىنىنا قاراي وتىرىپ، سەرىلىگىنە، كەيىپكەرگە جان بىتىرۋىنە سۇيسىنەسىڭ. مۇحامەدسايد سومداعان مۇقاعالي بەينەسى — پوەزيا مەن ءومىردىڭ، شىندىق پەن ارماننىڭ، مۇڭ مەن ماحابباتتىڭ توعىسقان كورىنىسى.
مۇقاعالي — سىرتقى ارەكەتتەن گورى ىشكى سەزىم الەمى باي، ويى مەن رۋحى بيىك تۇلعا. ول ساحنادا تەك اقىن ەمەس، ۇلت رۋحىنىڭ سيمۆولى رەتىندە ءومىر سۇرەدى.
مۇحامەدسايد — ويلى اكتەر. ءار بەينەسى وزىندىك مىنەزگە، وزگەشەلىككە تولى. مۇحامەدسايد تەك قانا تراگەديا، دراما عانا ەمەس، سونداي-اق كومەديا جانرىندا تۇرلەندىرەتىن مامان. سوزىمىزگە د.يسابەكوۆتىڭ «گاۋحارتاس» مۋزىكالىق دراماسىنداعى سەكسەنعالي وبرازى دالەل. سەكسەنعالي — مۇحامەدسايدتىڭ ءوزى ويلاپ تاپقان كەيىپكەرى. سەكسەنعاليعا قاراپ كەز كەلگەن توي-تومالاقتى كوتەرىپ، قىزدىرىپ جىبەرەتىن تۋىسقان، اۋىلداس اعالارىمىز ەلەستەيتىنى ءسوزسىز. مۇحامەدسايد سەكسەنعالي ارقىلى كەلۋشى كورەرمەنگە تەك قانا كۇلكى سىيلاپ قانا قويماي، ولارمەن بايلانىس ورناتادى. سول ارقىلى وبرازىنا جان بىتىرەدى.
قر حالىق ءارتيسى، قازاق ونەرىنىڭ تولەگەنى قۇمان تاستانبەكوۆ ء«رول — بۇل ءومىردىڭ ءبىر بولشەگى. ونى سەزىنبەي، سەندىرە المايسىڭ»، - دەيدى. مۇحامەدسايد وسىنى جەتە ۇعىنىپ، ءار كەيىپكەرىن ءومىردىڭ ءبىر بولىگى دەپ قاراستىرىپ، ەل الدىنا شىعارادى.
مۇحامەدسايد كوگىلدىر ەكران ارقىلى كوپتەگەن تەلەحيكايالار مەن فيلمدەردەن جاقسى تانىس. بىراق، سولاردىڭ ىشىندە ونەر سۇيەر قاۋىمنىڭ جۇرەگىنە جول تاۋىپ، تەبىرەنتكەن — «تاماشا» حيكاياسىنداعى قايسار ەدى. قايسار — مۇحامەدسايد تەلەحيكايانىڭ قوزعاۋشى كۇشى. سول ارقىلى وقيعالار ءوربىپ، ءوزارا بايلانىسادى. قايسار — مۇحامەدسايد ەكى جاقتى ويلاعان، وعان ىشتەي كۇيزەلگەن، كۇيزەلە تۇرىپ «تاماشا» وتاۋى ءۇشىن تاۋەكەلگە بەل بۋعان كەيىپكەر. مۇحامەدسايد وسىلايشا ءوز ءرولى ارقىلى تالاي جانعا وي سالدى.
قازاق تەاتر ونەرىنىڭ الىپ بايتەرەگى سەركە قوجامقۇلوۆ ء«ارتىس ساحناعا شىققانعا دەيىن اق تەر، كوك تەر بولىپ جۇمىس ىستەپ، شارشاپ-شالدىعادى. ال ساحنادا سونىڭ راحاتىن كورەدى. سوندىقتان دا، شىراعىم، شارشاپ-شالدىققانىڭا قاراماي، جالىقپاي ەڭبەك ەتسەڭ، حالىقتىڭ قۇرمەتىنە بولەنەسىڭ. ناعىز باقىتىڭدى سوندا تاباسىڭ»، - دەيدى.
مۇحامەدسايد ساحنا الاڭىنا شىعۋ ءۇشىن جالىقپاي ەڭبەك ەتىپ، ماڭداي تەرىن ايامايتىن جان. بالكىم، وسىدان-اق ونىڭ اكتەرلىك جولىنىڭ ىزگىلىگى كورىنىپ جاتقانداي.
باحتيار تۇرسىن
تەاترتانۋشى
