فوتو: Julien De Rosa/AFP/Getty Images
پاريجدە اپەللياتسيالىق سوتى 10 قاراشا كۇنى فرانتسيانىڭ بۇرىنعى پرەزيدەنتى نيكوليا ساركوزيدى تۇرمەدەن بوساتىپ، ونى سوت باقىلاۋىنا الۋ تۋرالى شەشىم قابىلدادى. بۇل تۋرالى BFM TV تەلەارناسى جازدى، دەپ حابارلايدى “ادىرنا”.
سوت پروكۋراتۋرانىڭ ءوتىنىشىن قاناعاتتاندىرىپ، ساركوزيدىڭ ادۆوكاتتارى بەرگەن اپەللياتسيالىق شاعىمدى قارادى. 70 جاستاعى ەكس-پرەزيدەنت شامامەن ءۇش اپتا بويى پاريجدەگى سانتە تۇرمەسىندە وتىرعان بولاتىن.
سايلاۋالدى كامپانيانى زاڭسىز قارجىلاندىرعانى ءۇشىن سوتتالعان ساركوزي ەندى ەلەكتروندى باقىلاۋ بىلەزىگىن تاعىپ جۇرۋگە مىندەتتى. سونداي-اق ول ءوز ءىسى بويىنشا ايىپتالۋشىلار مەن كۋاگەرلەرمەن بايلانىسۋعا تىيىم سالىندى.
سوت وتىرىسىنا بەينەبايلانىس ارقىلى قاتىسقان ساركوزي تۇرمەدەگى كۇندەرىن «وتە اۋىر» جانە «شارشاتارلىق» كەزەڭ دەپ اتادى. ونىڭ قورعاۋشىلارى بۇرىنعى پرەزيدەنتتى مەرزىمىنەن بۇرىن بوساتۋدى سۇراعان ەدى.
نيكوليا ساركوزي 2024 جىلدىڭ قىركۇيەك ايىنىڭ سوڭىندا بەس جىلعا باس بوستاندىعىنان ايىرىلعان بولاتىن. ول 21 قازاننان باستاپ جازاسىن وتەي باستاعان. ساركوزي جەكە كامەرادا ۇستالىپ، اپتاسىنا ءۇش رەت كەزدەسۋ قۇقىعىنا يە بولعان.
ساركوزي سوعىستان كەيىنگى كەزەڭدە تۇرمەگە تۇسكەن فرانتسيانىڭ العاشقى پرەزيدەنتى جانە ەۋروپالىق وداق ەلدەرىنىڭ ىشىندە وسىنداي جاعدايعا تاپ بولعان العاشقى بۇرىنعى مەملەكەت باسشىسى اتاندى.
فرانتسيا سوتى ساركوزيدى 2007 جىلعى پرەزيدەنتتىك سايلاۋالدى كامپانيانى ليۆيانىڭ بۇرىنعى باسشىسى مۋاممار كاددافيدىڭ قاراجاتىمەن زاڭسىز قارجىلاندىرعانى ءۇشىن كىنالى دەپ تانىعان. تەرگەۋ مالىمەتىنشە، كاددافي تاراپىنان ساركوزيدىڭ سايلاۋ ناۋقانىنا شامامەن 50 ميلليون ەۋرو بولىنگەن.
سونىمەن بىرگە ول مەملەكەتتىك قارجىنى جىمقىرۋ جانە ءپاسسيۆتى سىبايلاس جەمقورلىق باپتارى بويىنشا اقتالعان.
بۇعان دەيىن، 2024 جىلدىڭ جەلتوقسانىندا، ساركوزي «جەمقورلىق» ءىسى بويىنشا ءبىر جىلدىق ناقتى باس بوستاندىعىنان ايىرۋ جازاسىن العان بولاتىن. ول مەرزىمدى ءۇي قاماۋىندا ەلەكتروندى بىلەزىكپەن وتەدى.
فرانتسيا بيلىگى بۇرىنعى پرەزيدەنتتەن قۇرمەت وردەنى مەن «ەڭبەگى ءۇشىن» وردەنىن قايتارىپ الدى. بۇل شەشىم ەل تاريحىندا 1945 جىلدان بەرى العاش رەت قابىلدانىپ وتىر.
