اتىراۋ وبلىسى پروكۋراتۋراسى جانگەلدين اۋىلىندا قازا تاپقان قاراباليندەر وتباسىنا قاتىستى قىلمىستىق ءىس بويىنشا جاڭا ءمان-جايلاردى جاريالادى، دەپ حابارلايدى "ادىرنا" ۇلتتىق پورتالى.
تەرگەۋ اتىراۋ وبلىستىق پوليتسيا دەپارتامەنتى تاراپىنان جۇرگىزىلۋدە. باستاپقىدا ءىس قىلمىستىق كودەكستىڭ 99-بابى 2-بولىگىنىڭ 1-تارماعى (ەكى نەمەسە ودان دا كوپ ادامدى ءولتىرۋ) بويىنشا تىركەلگەن. الايدا كەيىن جاڭا ەپيزودتار انىقتالىپ، كۇدىكتى كۇيەۋ بالا سۇلتان سارسەماليەۆكە تاعىلعان ايىپتار كەڭەيتىلدى.
پروكۋراتۋرا مالىمەتىنشە، جابىرلەنۋشىلەردىڭ مالىن ساتۋ جانە مۇلكىن يەمدەنۋ دەرەكتەرى بويىنشا قىلمىستىق كودەكستىڭ 188-بابى («ۇرلىق») جانە 190-بابى («الاياقتىق») بويىنشا بولەك ىستەر تىركەلگەن. وسىلايشا، ءىس بويىنشا الاياقتىققا قاتىستى ءۇشىنشى ەپيزود پايدا بولعان. ونىڭ ناقتى ءمان-جايلارى ازىرگە جاريالانعان جوق.
سونىمەن قاتار، ءىس بويىنشا تاعى ءبىر كۇدىكتى – قازا بولعانداردىڭ قىزى، اقبايان مۇقانعاليەۆاعا قاتىستى دا اقپارات بەرىلدى. 10 ناۋرىزدا تەرگەۋ سوتىنىڭ شەشىمىمەن ول سوت-پسيحولوگيالىق-پسيحياتريالىق ساراپتامادان ءوتۋ ءۇشىن ارنايى مەديتسينالىق مەكەمەگە جىبەرىلگەن.
قاداعالاۋ ورگانىنىڭ حابارلاۋىنشا، قازىرگى ۋاقىتتا ونىڭ ارەكەتتەرىنە قۇقىقتىق باعا بەرىلمەگەن جانە بۇلتارتپاۋ شاراسى تاڭدالماعان. ەگەر پسيحيكالىق اۋىتقۋ بەلگىلەرى انىقتالسا، سوت ساراپتامالارى ينستيتۋتى بازاسىندا ستاتسيونارلىق كەشەندى ساراپتاما تاعايىنداۋ ماسەلەسى قارالادى.
پروكۋراتۋرا بارلىق ءمان-جايلار تولىق انىقتالىپ، ساراپتاما قورىتىندىلارى الىنعاننان كەيىن كۇدىكتىلەردىڭ ارەكەتتەرىنە تۇپكىلىكتى قۇقىقتىق باعا بەرىلەتىنىن مالىمدەدى. تەرگەۋ مەرزىمى جۇرگىزىلىپ جاتقان ساراپتامالار مەن پروتسەسسۋالدىق ارەكەتتەردىڭ كولەمىنە بايلانىستى بولادى.
