Air Astana اۋە كومپانياسى ۇشاقتاعى اپاتتى شىعۋ ەسىگىن ءوز بەتىنشە اشقان قازاقستاندىق ايەلدەن 23 ميلليون تەڭگە وتەماقى ءوندىرۋدى تالاپ ەتتى، دەپ حابارلايدى "ادىرنا" ۇلتتىق پورتالى.
سوت مالىمەتىنشە، رەيس استانادان الماتىعا باعىتتالعان. ۇشاق تراپتى كۇتىپ تۇرعان ساتتە جولاۋشى ايەل اپاتتى شىعۋ ەسىگىن اشىپ، ەۆاكۋاتسيالىق تراپتى ىسكە قوسقان.
سوت حابارلاماسىندا اپاتتى ەسىكتەر تەك توتەنشە جاعدايدا جانە ەكيپاج بۇيرىعىمەن عانا اشىلاتىنى ايتىلعان. اتالعان ارەكەت سالدارىنان اۋە كومپانياسىنا ماتەريالدىق شىعىن كەلىپ، تراپتى اۋىستىرۋعا 22 995 936 تەڭگە قاجەت بولعان.
تاراپتارعا تاتۋلاسۋ مۇمكىندىگى بەرىلىپ، ناتيجەسىندە ءوزارا كەلىسىم جاسالعان. كەلىسىم بويىنشا، ايەل 2025 جىلدىڭ 20 قاراشاسىنا دەيىن 6 698 426 تەڭگە وتەماقى تولەۋگە مىندەتتەلدى.
سوت تاراپتاردىڭ مەدياتسيالىق كەلىسىمىن بەكىتىپ، ءىس جۇرگىزۋدى توقتاتتى.
