«AMANAT» پارتياسى بارلىق دەڭگەيدەگى ءماسليحاتتاردى بيىلعى 1 جەلتوقسانعا دەيىن وڭايلاتىلعان دەكلاراتسيا نەگىزىندە ارنايى سالىق رەجيمىن قولدانعان كەزدە كورپوراتيۆتىك تابىس سالىعىنىڭ نەمەسە جەكە تابىس سالىعىنىڭ مولشەرلەمەسىن تومەندەتۋ تۋرالى شەشىم قابىلداۋعا شاقىرادى. بۇگىندە 27 اۋدان مەن قالادا سالىق 2-3%-عا دەيىن تومەندەتىلدى. پارتيالاستاردىڭ پىكىرىنشە، بۇل شارا شاعىن جانە ورتا بيزنەستىڭ فيسكالدىق جۇكتەمەسىن جەڭىلدەتۋگە مۇمكىندىك بەرەدى.
ءتۇرلى دەڭگەيدەگى ماسليحاتتارداعى «AMANAT» پارتياسى دەپۋتاتتىق كورپۋسىنىڭ اتقارعان جۇمىس ناتيجەسى «AMANAT» پارتياسىنىڭ حاتشىسى ەلدار جۇماعازيەۆتىڭ توراعالىعىمەن وتكەن كەڭەستە قارالدى. وعان وڭىرلەردەگى ءماسليحاتتاردىڭ توراعالارى قاتىستى. قاتىسۋشىلار پارتيانىڭ سايلاۋالدى ۋادەلەرىن ورىنداۋ، كاسىپكەرلەرگە قولداۋ كورسەتۋ ماسەلەلەرىن، سونداي-اق بيزنەس قاۋىمداستىعىنىڭ جاڭا سالىق كودەكسى بويىنشا جۇمىسقا دايىندىق دەڭگەيىن تالقىلادى.
ءىس-شارانى اشقان ەلدار جۇماعازيەۆ الداعى جىلى پارتيا بيزنەسكە بارىنشا قولداۋ كورسەتۋگە، مەملەكەتتىك شەشىمدەردىڭ اشىقتىعىن قامتاماسىز ەتۋگە، كاسىپكەرلەردىڭ، اسىرەسە شاعىن جانە ورتا بيزنەس يەلەرىنىڭ مۇددەلەرىن ەسكەرۋگە ءتيىس ەكەنىن اتاپ ءوتتى. كەلەسى جىلى 1 قاڭتاردان باستاپ كۇشىنە ەنەتىن جاڭا سالىق كودەكسىنە (جسك) سايكەس، وڭايلاتىلعان دەكلاراتسيا نەگىزىندە ارنايى سالىق رەجيمىنىڭ مولشەرلەمەسىن تومەندەتۋ نەمەسە ارتتىرۋ تۋرالى شەشىمدى ءماسليحاتتار قابىلدايدى جانە اتالعان ماسەلە بيىل 1 جەلتوقسانعا دەيىن تولىق شەشىلۋگە ءتيىس. ول بىرقاتار وڭىردە تالقىلاۋ جۇمىسى اياقتالعانىن جانە كەيبىر ءماسليحاتتار شاعىن جانە ورتا بيزنەستىڭ مۇددەلەرىن ەسكەرە وتىرىپ، تومەن مولشەرلەمەلەردى بەكىتكەنىن اتاپ ءوتتى.
«جاڭا سالىق جۇيەسى اياسىندا شاعىن جانە ورتا بيزنەس قوسىمشا جۇكتەمەگە تاپ بولۋى مۇمكىن. ءبىز ءبىر جاعىنان بيزنەس ءۇشىن ءادىل بولاتىن، سونىمەن بىرگە جەرگىلىكتى بيۋدجەتتەردىڭ تۇراقتىلىعىن قامتاماسىز ەتەتىن شەشىمدەر قابىلداۋىمىز كەرەك. ءماسليحاتتاردىڭ مولشەرلەمەلەردى بەكىتۋ تۋرالى قاۋلىلارى نەگىزدەلىپ، كاسىپكەرلەرگە جەتكىزىلۋگە ءتيىس. مولشەرلەمەلەرگە كەز-كەلگەن وزگەرىس ەنگىزۋ ارەكەتى مۇقيات ساراپتالىپ، بيزنەس-قوعامداستىققا ءجىتى ءتۇسىندىرىلۋى كەرەك»، – دەدى پارتيا حاتشىسى.
ماسەلەن، 28 قازاندا وسكەمەن قالاسىندا ءتيىستى شەشىم قابىلداندى. وسكەمەن قالالىق ءماسليحاتىنىڭ توراعاسى الەكساندر سۆەتاشتىڭ ايتۋىنشا، ارنايى سالىق رەجيمى اياسىندا مولشەرلەمەنى تومەندەتۋ قادامى كاسىپكەرلەردى «كولەڭكەلى ايماقتان» شىعۋعا جانە سالىقتى بەلگىلەنگەن تارتىپپەن تولەۋگە ىنتالاندىرادى. وبلىس ورتالىعىندا ءتىپتى بيزنەس سۋبەكتىلەرىنىڭ سانى ارتىپ كەلەدى.
ال وسى جىلى 17 قازاندا سولتۇستىك قازاقستان وبلىسى اققايىڭ اۋدانىندا ءماسليحات دەپۋتاتتارى سالىق مولشەرلەمەسىن 4%-دان 3%-عا دەيىن تومەندەتۋ باستاماسىنا قولداۋ ءبىلدىردى. حالىق قالاۋلىلارىنىڭ پىكىرىنشە، بۇل شارا بولاشاقتا جاڭا كاسىپورىنداردىڭ اشىلۋىنا ىقپال ەتىپ، ناتيجەسىندە حالىقتى جۇمىسپەن قامتۋ دەڭگەيى ارتادى.
بۇعان قوسا، اتىراۋ قالاسىندا، اتىراۋ وبلىسىنا قاراستى ماحامبەت جانە جىلىوي اۋداندارىندا، سونداي-اق اقمولا وبلىسىنىڭ جاقسى اۋدانىنان باسقا بارلىق اۋدانىندا 2% تومەندەتىلگەن مولشەرلەمە بەكىتىلدى.
كەڭەس بارىسىندا وڭىرلەردەگى پارتيا فيليالدارى جانىنداعى كاسىپكەرلىك ماسەلەلەرى بويىنشا ۇيلەستىرۋ كەڭەستەرىنىڭ جۇمىسىن ۇيىمداستىرۋ قادامدارى دا تالقىلاندى. ەلدار جۇماعازيەۆ بۇگىندە بيزنەستى تولعاندىرعان تۇيتكىلدى ماسەلەلەردىڭ ءتىزىمىن قۇرۋ جۇمىسىن اياقتاۋدىڭ ماڭىزى زور ەكەنىن اتاپ ءوتتى.
ء «بىزدىڭ مىندەتىمىز – جيىنداردى فورمالدى تۇردە وتكىزۋ ەمەس، بيزنەستى تولعاندىرعان وزەكتى ماسەلەلەردى انىقتاۋ، ولاردى جەرگىلىكتى جانە ورتالىق مەملەكەتتىك ورگاندارعا جەتكىزۋ، ماسەلەنى جەرگىلىكتى جەردە شەشۋ جۇمىسىن قامتاماسىز ەتۋ. كاسىپكەرلەر پارتيا قولداۋىن سەزىنۋى كەرەك. ءبىز ولارعا جوبالارىن جۇزەگە اسىرۋعا جانە بيزنەس تۇراقتىلىعىن ساقتاپ قالۋعا مۇمكىندىك بەرۋىمىز كەرەك. بۇل قادام، اسىرەسە سالىق زاڭناماسى وزگەرگەن تۇستا اسا ماڭىزدى»، – دەپ تۇيىندەدى پارتيا حاتشىسى.
ايتا كەتەيىك، ەلىمىزدەگى 8 وبلىستا ورنالاسقان 27 اۋدان مەن قالادا وڭايلاتىلعان دەكلاراتسيا نەگىزىندە جاڭا ارنايى سالىق رەجيمى ءۇشىن مولشەرلەمەنى تومەندەتۋ تۋرالى شەشىم قابىلداندى. سونىمەن قاتار، تاعى 60 اۋداندا مولشەرلەمە تومەندەۋى كۇتىلۋدە.
