ۇلتتىق بانكتىڭ اقشا-كرەديت ساياساتى كوميتەتى بازالىق مولشەرلەمەنى +/- 1 پ.ت. دالىزىمەن جىلدىق 18,0% دەڭگەيىندە ساقتاۋ تۋرالى شەشىم قابىلدادى، دەپ حابارلايدى "ادىرنا".
ۇلتتىق بانكتىڭ اقپاراتىنشا، جىلدىق ينفلياتسيا قازاندا 12,6% بولعان، ال قىركۇيەكتە – 12,9%. ازىق-تۇلىك تاۋارلارىنىڭ باعاسى 13,5%-عا جانە ازىق-تۇلىككە جاتپايتىن تاۋارلار باعاسى 11%-عا ءوستى. قىزمەتتەردەگى باعانىڭ ءوسۋى رەتتەلەتىن تۇرعىن ءۇي-كوممۋنالدىق قىزمەتتەرگە باعانىڭ اكىمشىلىك تومەندەۋى سالدارىنان 12,9%-عا دەيىن باياۋلادى.
«جەكەلەگەن تاۋار نارىقتارىندا ساقتالىپ وتىرعان تەڭگەرىمسىزدىك، ورنىقتى سۇرانىس، يمپورتتىڭ قىمباتتاۋى جانە شىعىنداردىڭ ءوسۋى اياسىندا ازىق-تۇلىك كومپونەنتى بۇرىنعىشا ينفلياتسياعا كوپتەپ ۇلەس قوستى. سەرۆيستىك ينفلياتسيانىڭ ۇلەسى ازايدى، الايدا باعانىڭ ءوسۋ قارقىنى باياۋلاعانىنا قاراماستان ماڭىزدى كۇيىندە قالىپ وتىر. ازىق-تۇلىككە جاتپايتىن ينفلياتسيادا جانارماي مەن فارماتسەۆتيكالىق ءونىم باعاسىنىڭ ءوسۋى جەدەلدەگەنى بايقالادى. قازاندا ايلىق ينفلياتسيا 0,5%-عا دەيىن ايتارلىقتاي باياۋلادى، الايدا بازالىق ينفلياتسيا 1% دەڭگەيىندە – جوعارى كۇيىندە قالدى. بۇل ءبىر جىلعا ەسەپتەگەندە 12,2% سايكەس كەلەدى. سونىمەن قاتار تۇتىنۋ قورجىنىنداعى تاۋارلار مەن قىزمەتتەردىڭ شامامەن 80%-ى 5% تارگەتتەن جوعارى قارقىنمەن قىمباتتايدى»، - دەلىنگەن حابارلامادا.
ۇلتتىق بانكتىڭ پايىمىنشا، جوعارى ينفلياتسيالىق بولجام، ورنىقتى بازالىق ينفلياتسيا مەن تاريفتىك رەفورمالاردىڭ كەيىنگە قالدىرىلعان اسەرىن ەسكەرگەندە، 2026 جىلدىڭ ءبىرىنشى جارتىسىنىڭ سوڭىنا دەيىن مولشەرلەمەنى تومەندەتۋ مۇمكىن بولمايدى.
«ينفلياتسيانىڭ ورنىقتى باياۋلاۋ ءۇردىسى قالىپتاسقانىنا سەنىمدىلىك بولماعان جاعدايدا اقشا-كرەديت شارتتارى قاتاڭداتىلۋى مۇمكىن»، - دەپ اتاپ ءوتتى ۇلتتىق بانك.
بازالىق مولشەرلەمە بويىنشا كەزەكتى جوسپارلى شەشىم 2026 جىلعى 23 قاڭتاردا جاريالانادى.
