پرەزيدەنت قاسىم-جومارت توقاەۆ پالەستينا مەملەكەتىنىڭ جوعارى سۋدياسىن قابىلدادى، دەپ حابارلايدى "ادىرنا" ۇلتتىق پورتالى.
پالەستينا مەملەكەتىنىڭ جوعارى سۋدياسى، پرەزيدەنتتىڭ ءدىن ىستەرى جونىندەگى كەڭەسشىسى ماحمۇد ءال-حابباشتى قازاقستان پرەزيدەنتى قابىلدادى.
كەزدەسۋ بارىسىندا پرەزيدەنت ديپلوماتيالىق قارىم-قاتىناس ورناعان ۋاقىتتان بەرى قازاقستان مەن پالەستينا اراسىنداعى ىنتىماقتاستىق دوستىق، ءوزارا قۇرمەت پەن قولداۋ رۋحىندا دامىپ كەلە جاتقانىن اتاپ ءوتتى.
قاسىم-جومارت توقاەۆ قازاقستان پالەستينانى حالىقارالىق قاۋىمداستىقتىڭ تولىققاندى مۇشەسى رەتىندە تانۋعا باعىتتالعان باستامالاردى تۇراقتى تۇردە قولدايتىنىن جەتكىزدى. سونىمەن قاتار مەملەكەت باسشىسى تاياۋ شىعىستاعى جاعدايدى بۇۇ جارعىسى مەن حالىقارالىق قۇقىق نورمالارىنا ساي ديپلوماتيالىق جولمەن رەتتەۋ قاجەتتىگىن جانە «ەكى حالىق ءۇشىن – ەكى مەملەكەت» قاعيداتى نەگىزىندە پالەستينا مەملەكەتىن قۇرۋدى جاقتايتىنىن مالىمدەدى.
كەزدەسۋ بارىسىندا ماحمۇد ءال-حابباش پالەستينا پرەزيدەنتى ماحمۇد ابباستىڭ قاسىم-جومارت توقاەۆقا جولداعان حاتىن تابىستاپ، قازاقستاننىڭ پالەستينا حالقىنا كورسەتىپ وتىرعان تۇراقتى قولداۋى ءۇشىن العىس ءبىلدىردى.
كەزدەسۋ سوڭىندا مەملەكەت باسشىسى پالەستينا پرەزيدەنتى ماحمۇد ابباسقا ىزگى سالەمىن جولداپ، ونى قازاقستانعا رەسمي ساپارمەن كەلۋگە شاقىردى.
