قاتار استاناسى دوحا قالاسىندا قازاقستان رەسپۋبليكاسى پرەزيدەنتىنىڭ تەلەراديوكەشەنى مەن Al Jazeera Media Network باسشىلىعىنىڭ كەزدەسۋى ءوتتى.
كەزدەسۋگە قازاقستان رەسپۋبليكاسى پرەزيدەنتىنىڭ تەلەراديوكەشەنىنىڭ ديرەكتورى راۋشان قاجىباەۆا مەن Al Jazeera Media Network باس ديرەكتورى شەيح ناسسەر بين فەيسال ءال تاني قاتىستى. تاراپتار ەكىجاقتى ىنتىماقتاستىقتى دامىتۋ، سونداي-اق Al Jazeera مەدياجەلىسىنىڭ ورتالىق ازيا وڭىرىندەگى قاتىسۋىن كەڭەيتۋ ماسەلەلەرىن تالقىلادى.
كەلىسسوز بارىسىندا Al Jazeera تاراپىنان قازاقستان اۋماعىندا ارنا حابارىن ۇيىمداستىرۋعا جانە بۇكىل ورتالىق ازياداعى وقيعالاردى قامتيتىن كاسىبي مەديا الاڭ قۇرۋعا قىزىعۋشىلىق ءبىلدىرىلدى. سونىمەن قاتار، ءوڭىر جۋرناليستەرىنىڭ كاسىبي بىلىكتىلىگىن ارتتىرۋعا باعىتتالعان بىرلەسكەن جوبالاردى ىسكە اسىرۋ مۇمكىندىكتەرى قاراستىرىلدى. تاراپتار بۇل باستامالاردى 2026 جىلدان باستاپ پراكتيكالىق تۇرعىدا جۇزەگە اسىرۋعا ۋاعدالاستى.
Al Jazeera Media Network باس ديرەكتورى راۋشان قاجىباەۆاعا كەزدەسۋگە شاقىرعانى ءۇشىن العىس ءبىلدىرىپ، جاقىن ارادا قازاقستانعا جۇمىس ساپارىمەن كەلۋگە دايىن ەكەنىن راستادى.
ساپار اياسىندا راۋشان قاجىباەۆا Al Jazeera Media Institute ديرەكتورى يمان ءال امريمەن دە كەزدەستى. ەسكە سالا كەتەيىك، 2024 جىلى تاراپتار Maqsut Narikbayev University جانىنداعى حالىقارالىق جۋرناليستيكا مەكتەبىنىڭ ستۋدەنتتەرى مەن قازاقستاندىق جۋرناليستەر ءۇشىن قازاقستاندا العاش رەت «Al Jazeera اپتالىعىن» وتكىزگەن بولاتىن.
كەزدەسۋ بارىسىندا 2026 جىلى «Al Jazeera اپتالىعىن» قايتا وتكىزۋ جوسپارلارى ناقتىلانىپ، قازاقستاندىق ستۋدەنتتەر مەن مەديا سالاسىنىڭ ماماندارىنا Al Jazeera Media Institute-ءتىڭ كوپجىلدىق تاجىريبەگە نەگىزدەلگەن كاسىبي ادەبيەتتەر كىتاپحاناسىنا قولجەتىمدىلىك بەرۋ ۇسىنىلدى.
ايتا كەتەيىك، 2025 جىلى قازاقستان پرەزيدەنتى قاسىم-جومارت توقاەۆ Al Jazeera English تەلەارناسىنا ەكسكليۋزيۆتى سۇحبات بەرگەن. قازاقستان رەسپۋبليكاسى پرەزيدەنتىنىڭ تەلەراديوكەشەنى – ەلدەگى كونتەنت ءوندىرىسى مەن تاراتۋدىڭ تولىق تسيكلىن قامتيتىن ءىرى مەديا قۇرىلىم. ونىڭ قۇرامىنا Jibek Joly تەلەارناسى مەن راديوسى، Silk Way, Silk Way Cinema, Silk Way Prime حالىقارالىق ارنالارى، قازينفورم حالىقارالىق اقپارات اگەنتتىگى جانە دەرەكتى كينو ورتالىعى كىرەدى.
Al Jazeera تەلەكومپانياسى 1996 جىلى قاتار ءامىرىنىڭ جارلىعىمەن قۇرىلعان. بۇگىندە ول اراب جانە اعىلشىن تىلدەرىندە الەمنىڭ كوپتەگەن ەلىندە حابار تاراتىپ، 50-دەن استام شەتەلدىك بيۋروسى ارقىلى جاھاندىق اقپارات كەڭىستىگىندە بەلسەندى جۇمىس جۇرگىزىپ كەلەدى.
