Qatar astanasy Doha qalasynda Qazaqstan Respublikasy Prezidentınıŋ Teleradiokeşenı men Al Jazeera Media Network basşylyǧynyŋ kezdesuı öttı.
Kezdesuge Qazaqstan Respublikasy Prezidentınıŋ Teleradiokeşenınıŋ direktory Rauşan Qajybaeva men Al Jazeera Media Network bas direktory Şeih Nasser bin Feisal Äl Tani qatysty. Taraptar ekıjaqty yntymaqtastyqty damytu, sondai-aq Al Jazeera mediajelısınıŋ Ortalyq Aziia öŋırındegı qatysuyn keŋeitu mäselelerın talqylady.
Kelıssöz barysynda Al Jazeera tarapynan Qazaqstan aumaǧynda arna habaryn ūiymdastyruǧa jäne bükıl Ortalyq Aziiadaǧy oqiǧalardy qamtityn käsıbi media alaŋ qūruǧa qyzyǧuşylyq bıldırıldı. Sonymen qatar, öŋır jurnalisterınıŋ käsıbi bılıktılıgın arttyruǧa baǧyttalǧan bırlesken jobalardy ıske asyru mümkındıkterı qarastyryldy. Taraptar būl bastamalardy 2026 jyldan bastap praktikalyq tūrǧyda jüzege asyruǧa uaǧdalasty.
Al Jazeera Media Network bas direktory Rauşan Qajybaevaǧa kezdesuge şaqyrǧany üşın alǧys bıldırıp, jaqyn arada Qazaqstanǧa jūmys saparymen keluge daiyn ekenın rastady.
Sapar aiasynda Rauşan Qajybaeva Al Jazeera Media Institute direktory İman Äl Amrimen de kezdestı. Eske sala keteiık, 2024 jyly taraptar Maqsut Narikbayev University janyndaǧy Halyqaralyq jurnalistika mektebınıŋ studentterı men qazaqstandyq jurnalister üşın Qazaqstanda alǧaş ret «Al Jazeera aptalyǧyn» ötkızgen bolatyn.
Kezdesu barysynda 2026 jyly «Al Jazeera aptalyǧyn» qaita ötkızu josparlary naqtylanyp, qazaqstandyq studentter men media salasynyŋ mamandaryna Al Jazeera Media Institute-tıŋ köpjyldyq täjıribege negızdelgen käsıbi ädebietter kıtaphanasyna qoljetımdılık beru ūsynyldy.
Aita keteiık, 2025 jyly Qazaqstan Prezidentı Qasym-Jomart Toqaev Al Jazeera English telearnasyna ekskliuzivtı sūhbat bergen. Qazaqstan Respublikasy Prezidentınıŋ Teleradiokeşenı – eldegı kontent öndırısı men taratudyŋ tolyq siklın qamtityn ırı media qūrylym. Onyŋ qūramyna Jibek Joly telearnasy men radiosy, Silk Way, Silk Way Cinema, Silk Way Prime halyqaralyq arnalary, Qazinform halyqaralyq aqparat agenttıgı jäne Derektı kino ortalyǧy kıredı.
Al Jazeera telekompaniiasy 1996 jyly Qatar ämırınıŋ jarlyǧymen qūrylǧan. Bügınde ol arab jäne aǧylşyn tılderınde älemnıŋ köptegen elınde habar taratyp, 50-den astam şeteldık biurosy arqyly jahandyq aqparat keŋıstıgınde belsendı jūmys jürgızıp keledı.
