پرەمەر-ءمينيستردىڭ ءبىرىنشى ورىنباسارى رومان سكلياردىڭ توراعالىعىمەن كيىكتەر پوپۋلياتسياسىن تۇراقتى باسقارۋ بويىنشا وتكىزىلگەن ءىس-شارالاردىڭ قورىتىندىلارى تىڭدالدى. بۇل تۋرالى 2 جەلتوقساندا ۇكىمەتتىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
كەڭەستە ەكولوگيا جانە تابيعي رەسۋرستار ءمينيسترى ەرلان نىسانباەۆ، سونداي-اق باسقا دا مەملەكەتتىك ورگانداردىڭ وكىلدەرى ءسوز سويلەدى.
ەكولوگيا مينيسترلىگىنىڭ دەرەكتەرى بويىنشا قازاقستانداعى كيىكتەردىڭ سانى بۇگىن رەكوردتىق دەڭگەيگە، 4 ملن داراققا جەتكەن. سونداي-اق 2026 جىلى تولدەۋدەن كەيىن شامامەن 5 ملن داراقتى قۇرايدى.
وسىنداي قارقىندى ءوسۋدى ەسكەرە وتىرىپ، ۋاكىلەتتى ورگاندار زوولوگيا ينستيتۋتى دايىنداعان بيولوگيالىق نەگىزدەمە نەگىزىندە اۋىل شارۋاشىلىعىنا زيان كەلتىرمەۋ جانە ەكوجۇيەلىك تەپە-تەڭدىكتى ساقتاۋ ءۇشىن جانۋارلار سانىن تۇراقتى باسقارۋ بويىنشا ءىس-شارالار جۇرگىزگەن.
ماسەلەن، وسى جىلى 1 شىلدەدەن 30 قاراشاعا دەيىن 196 مىڭعا جۋىق داراق تاركىلەندى، ۇشالارى وتاندىق ەت وڭدەۋ كاسىپورىندارىنا بەرىلگەن. جۇمىستار عىلىمي ۇسىنىمدارعا سايكەس قاتاڭ تۇردە جۇرگىزىلگەن.
«كيىكتەردىڭ بارلىق مۇيىزدەرى ەسكەرىلىپ، تاڭبالانىپ، مينيسترلىككە ۆەدومستۆولىق باعىنىستى «وحوتزووپروم» ءوب» رمقك ۇيىمىندا كۇشەيتىلگەن كۇزەت جانە مامانداندىرىلعان ينفراقۇرىلىم جاعدايلارىندا ساقتالادى»،-دەلىنگەن حابارلامادا.
جيىن قورىتىندىسى بويىنشا رومان سكليار ەكولوگيا جانە تابيعي رەسۋرستار مينيسترلىگىنە جانە باسقا دا مۇددەلى مەملەكەتتىك ورگاندارعا 2026 جىلعا كيىك سانىن تۇراقتى باسقارۋعا دايىندىق بويىنشا شارالار قابىلداۋدى، سونداي-اق CITES شەشىمدەرىن ەسكەرە وتىرىپ، دەريۆاتتاردىڭ تاڭبالانۋى مەن اينالىمى جونىندەگى نورماتيۆتىك بازانى قالىپتاستىرۋدى اياقتاۋدى تاپسىردى.
