بەلگىلى عالىم، حيميا عىلىمدارىنىڭ دوكتورى، پروفەسسور زۇلحايىر مانسۇروۆ ەلىمىزدەگى عىلىمي زەرتتەۋلەردىڭ قازىرگى جاي-كۇيى تۋرالى پىكىر ءبىلدىردى. ايتۋىنشا، سوڭعى جىلدارى جاس عالىمدارعا قولداۋ كۇشەيىپ، كوپتەگەن زەرتتەۋ جوباسى جۇزەگە اسقانىمەن، سالادا شەشىلمەگەن ماسەلەلەر دە از ەمەس، دەپ حابارلايدى «ادىرنا» ءتىلشىسى.
پروفەسسور بيىل جانۋ پروبلەمالارى ينستيتۋتىنىڭ قىزمەتكەرلەرى جاس عالىمدارعا ارناپ ۇيىمداستىرلعان كونكۋرستا توپ جارعاندارىن جەتكىزدى.
«40 جاسقا دەيىنگى عالىمدارىمىز قاتىسىپ، گرانت ۇتىپ الدى. بيىل ءبىزدىڭ ينستيتۋتتىڭ عالىمدارى 25 جوبا بويىنشا زەرتتەۋلەر جۇرگىزىپ، عىلىمي جۇمىس جازدى. مۇنىڭ ءبارى جاقسى، دەگەنمەن پروبلەما مۇلدە جوق دەسەم وتىرىك بولار. ماسەلەن، ءبىز سەكىلدى عىلىمي-زەرتتەۋ ينستيتۋتتارىنا وتە قاجەت، قىمبات ەلەكترون ميكروسكوپتار بىزدە جوق...
مەن جاقىندا قىتايدىڭ مەتالداردى زەرتتەۋ ينستيتۋتىندا بولدىم. سوندا ءاربىرىنىڭ قۇنى 1 ميلليون دوللار تۇراتىن 2 جانە ءاربىرىنىڭ قۇنى 10 ميلليون دوللار تۇراتىن 2 ەلەكترون ميكروسكوپ كوردىم. ول نانوتەحنولوگيالىق زەرتتەۋلەر ءۇشىن اسا قاجەت قۇرال عوي. ول بىزدە جوق بولعاندىقتان، ءبىزدىڭ دوكتورانتتار ءۇش جىلدا ءبىر رەت شەتەلگە شىققاندا وزدەرى جاساعان نانوماتەريالداردى الىپ بارىپ، الگىندەي ميكروسكوپ ارقىلى كورەدى. ال ونى اقىسىز كورە المايسىڭ. بىزدە ون جىل بۇرىن الىنعان ميكروسكوپتار ەسكىرىپ قالدى، قازىر ونداي قۇرالدى الەمدىك نانوتەحنيكالىق زەرتتەۋ ورتالىعىندا پايدالانبايدى. دەمەك، زەرتتەۋىمىز تياناقتى بولۋى ءۇشىن بىزگە سوڭعى ۇلگىدەگى ەلەكترون ميكروسكوپتار كەرەك. سونى ساتىپ الۋعا كومەكتەسىڭىز دەپ ءبىلىم جانە عىلىم مينيسترلەرىنە حات جازام، ال ولار ءجيى اۋىسىپ جاتادى. بىراق كومەك قولىن سوزعان ەمەس»،- دەدى ول Turkystan.kz-كە بەرگەن سۇقباتىندا.
زۇلحايىر مانسۇروۆ ەلىمىزدە Scopus جۇيەسىنە كىرەتىن ءبىرىنشى دارەجەلى عىلىمي جۋرنال جوقەكەنىن اتاپ ءوتتى.
«قازىر عىلىم جولىندا جۇرگەن جاستار Scopus مالىمەتتەر بازاسىنا كىرەتىن يمپاكت-فاكتورلى جۋرنالدارعا ماقالالارىن شىعارۋعا ءتيىس. ول وڭاي ەمەس. ونداي جۋرنالدارعا ماتەريالىڭنىڭ عىلىمي ستاندارتقا كەلۋى ءبىر قيىندىق بولسا، اقشا تولەپ، كەزەك كۇتىپ بارىپ باستىرۋ – تاعى ءبىر قيىندىق. ەلىمىزدە شىعاتىن، Scopus جۇيەسىنە كىرەتىن ءبىرىنشى دارەجەلى عىلىمي جۋرنال جوق. مەن شىعارىپ وتىرعان «Euroasian chemico-technological journal» Scopus جۇيەسىنە كىرگەنىمەن، ءۇشىنشى دارەجەلى جۋرنال. اعىلشىن تىلىندە شىققانىمەن مۇندا جاريالانعان ماتەريالداردى بۇكىل الەم وقىمايدى. ال بۇل جۋرنالدى ءبىرىنشى دارەجەلى جۋرنال ەتۋ ءۇشىن جىلىنا 50 مىڭ دوللار تولەۋ قاجەت. مىنە، جوعارىدا ايتىپ كەتكەن قىمبات ميكروسكوپ پەن جۋرنالدىڭ رەيتينگىن كوتەرۋگە قاراجات سۇراپ جوعارىداعى كىسىلەرگە سان رەت حات جازدىم، – جاۋاپ جوق. ەگەر قۇنى قىمبات تۇراتىن ميكروسكوبىمىز بولعاندا عالىمدارىمىز وزدەرى تاپقان نانوماتەريالدى قاراپ، زەرتتەۋ ءۇشىن وزگە ەلگە اقشا تولەپ جۇرمەس ەدى، سول سياقتى Scopus جۇيەسىنە كىرەتىن ءوز يمپاكت-فاكتورلى ءبىرىنشى دارەجەلى جۋرنالىمىز بولعاندا، جاس عالىمدار شەتەلدىك جۋرنالدارعا ماتەريالىن شىعارا الماي قينالىپ جۇرمەس ەدى»،- دەپ تولىقتىردى ول.
پروفەسسور شەتەلدىك تاعىلىمداماعا باراتىن دوكتورانتتارعا بولىنەتىن قاراجات كولەمى دە ازايعانىن جەتكىزدى.
«بۇرىن دوكتورانتتارعا شەتەلدەن تاعىلىمدامادان ءوتۋ ءۇشىن 3 اي ۋاقىتقا قاراجات بەرىلەتىن بولسا، قازىر 1 جارىم ايعا عانا جەتەتىن اقشا بەرىلەدى. سوسىن، شەتەلدىك عىلىمي ورتالىقتاردا زەرتتەۋ جۇرگىزۋگە جانە جەتەكشىلىك ەتەتىن شەتەلدىك عالىمعا اقشا تولەۋ قاجەت. مەملەكەت بۇرىن وعان كومەكتەسەتىن، قازىر قارجى ءبولۋدى توقتاتتى. بۇل ايتىلعان نارسەلەر ەلىمىزدە عىلىمنىڭ دامۋىنا كەدەرگى بولاتىن فاكتورلار دەر ەدىم. وسىنى ءسىزدىڭ گازەت ارقىلى ءتيىستى ورىنداردىڭ نازارىنا تاعى ءبىر رەت سالىپ قويسام، ارتىق بولماس دەپ ويلايمىن»،-دەدى عالىم.
