الماتى قالاسى مەگاپوليستىڭ سۋمەن جابدىقتاۋ جانە كارىز جۇيەسىن جاڭعىرتۋ باعىتىندا حالىقارالىق ىنتىماقتاستىقتى جۇيەلى تۇردە نىعايتىپ كەلەدى. وسى ماقساتتا الماتى قالاسى ەنەرگەتيكا جانە سۋ شارۋاشىلىعى باسقارماسىنا قاراستى «الماتى سۋ» كوممۋنالدىق مەملەكەتتىك كاسىپورنى كورەيا رەسپۋبليكاسىنىڭ ۇلتتىق سۋ ونەركاسىبى كلاستەرىمەن ءوزارا ىنتىماقتاستىق تۋرالى مەموراندۋمعا قول قويدى.
كورەيا رەسپۋبليكاسىنىڭ جەتەكشى كومپانيالارىمەن ورناتىلعان سەرىكتەستىك الماتى قالاسىنداعى سۋ شارۋاشىلىعى سالاسىن تسيفرلاندىرۋ ۇدەرىسىن جەدەلدەتۋگە، وزىق حالىقارالىق تاجىريبەنى ەنگىزۋگە، سونداي-اق سۋ رەسۋرستارىن ءتيىمدى ءارى تۇراقتى باسقارۋعا مۇمكىندىك بەرەدى. تاراپتار سۋ ينفراقۇرىلىمىن باسقارۋدا زاماناۋي تەحنولوگيالاردى قولدانۋ ماسەلەلەرىنە ەرەكشە نازار اۋدارىپ وتىر.
اتاپ ايتقاندا، كورەيا رەسپۋبليكاسى «الماتى سۋ» كاسىپورنى جۇزەگە اسىرىپ جاتقان «تسيفرلىق ەگىز» جوباسىنا قولداۋ كورسەتەدى. بۇل جوبا داتچيكتەر، جاساندى ينتەللەكت جانە سيمۋلياتسيالىق مودەلدەر نەگىزىندە ينفراقۇرىلىم نىساندارىنىڭ جۇمىسىن ناقتى ۋاقىت رەجيمىندە باقىلاۋعا، تالداۋعا جانە باسقارۋعا مۇمكىندىك بەرەتىن ۆيرتۋالدى جۇيەنى قالىپتاستىرۋدى كوزدەيدى.
پيلوتتىق جوبا اياسىندا باس تازارتۋ نىساندارىنا زاماناۋي سۋ ولشەگىش قۇرالدار ورناتىلدى. الداعى كەزەڭدە «اقىلدى» ەسەپتەگىشتەردى كەڭىنەن قولدانۋ باعىتىنداعى ىنتىماقتاستىق اياسىن كەڭەيتۋ جوسپارلانىپ وتىر. سونىمەن قاتار، ەنەرگيا تيىمدىلىگىن ارتتىرۋ مەن ەكولوگيالىق تۇراقتىلىقتى قامتاماسىز ەتۋگە باعىتتالعان سۋ تازارتۋ جانە سۋمەن جابدىقتاۋ جۇيەلەرىن جاڭعىرتۋ جونىندەگى بىرقاتار جوبالاردى ىسكە اسىرۋ مۇمكىندىگى قاراستىرىلۋدا.
بۇل ارىپتەستىك جاڭا تسيفرلىق شەشىمدەردى ەنگىزۋگە، كورسەتىلەتىن قىزمەتتەردىڭ ساپاسىن ارتتىرۋعا جانە سۋ رەسۋرستارىن باسقارۋداعى تيىمدىلىكتى كۇشەيتۋگە جول اشادى.
ايتا كەتەيىك، كورەيا رەسپۋبليكاسىنىڭ ۇلتتىق سۋ ونەركاسىبى كلاستەرى سۋمەن جابدىقتاۋ، سۋ تازارتۋ جانە سۋ رەسۋرستارىن باسقارۋ سالاسىنداعى مەملەكەتتىك ورگانداردى، عىلىمي-زەرتتەۋ ۇيىمدارىن جانە جەكە سەكتور وكىلدەرىن بىرىكتىرەتىن بەدەلدى قۇرىلىم بولىپ تابىلادى.
ال «الماتى سۋ» كوممۋنالدىق مەملەكەتتىك كاسىپورنى — قازاقستانداعى سۋمەن جابدىقتاۋ جانە سۋ بۇرۋ سالاسىنداعى ەڭ ءىرى ۇيىمداردىڭ ءبىرى. كاسىپورىن الماتى قالاسىن عانا ەمەس، وعان ىرگەلەس ەلدى مەكەندەردى دە ساپالى اۋىزسۋمەن قامتاماسىز ەتىپ وتىر.
