الماتى وبلىسىندا توتەنشە جاعدايلار دەپارتامەنتىنىڭ قىزمەتكەرى باسقارعان كولىك اۋدارىلىپ جۇرگىزۋشى وقيعا ورنىندا قازا تاپتى. مارقۇمنىڭ تۋىستارى قايعىلى جاعدايعا تەحنيكانىڭ توزىعى جەتكەنى سەبەپ بولدى دەپ ايتۋدا، دەپ حابارلايدى "ادىرنا".
جول-كولىك وقيعاسى 12 جەلتوقسان كۇنى الماتى-قاپشاعاي-باقاناس تاس جولىندا بولعان. ۋاز ماركالى قىزمەتتىك كولىكتە ەكى قۇتقارۋشى بولعان. جولدىڭ تايعاق بولۋى سالدارىنان اۆتوكولىك باسقارۋعا كونبەي اۋدارىلىپ قالعان. اپات بولعان اۋماقتا ۇيالى بايلانىس جەلىسى ۇستاماعاندىقتان ءتىرى قالعان جولاۋشى جولعا جاياۋ شىعىپ كومەك شاقىرعان. الايدا جەتكەن دارىگەرلەر جۇرگىزۋشىنىڭ جان ءتاسىلىم ەتكەنىن راستادى.
قازا تاپقان ازاماتتىڭ ەسىمى – فارحاد امانباەۆ. ونىڭ جاقىندارى اپاتقا ۇشىراعان كولىكتىڭ قىزمەتكە جارامسىز ەكەنىن جانە ونى ەسەپتەن شىعارىلعان جەدەل جاردەم ماشيناسىنىڭ بولشەكتەرىمەن قۇراستىرعانىن العا تارتتى. ولار ۇلىنىڭ قولدان جوندەلگەن ەسكى تەحنيكامەن پوليگونعا جىبەرىلگەنىنە ۆەدومستۆو باسشىلىعىن كىنالاپ وتىر.
دالەل رەتىندە مارقۇمنىڭ تۋىستارى بىرنەشە بەينەجازبا ۇسىندى. ونىڭ بىرىندە فارحاد امانباەۆ اپاتتان ءبىر ساعات بۇرىن رولدە كەلە جاتىپ ارىپتەستەرىنە ۇندەۋ جولداعان. ول ۆيدەودا كولىكتى جوندەۋگە كىرىسكەن سوڭ ونى نەگە ساپالى ىستەمەگەندەرىنە نارازىلىق بىلدىرگەن. جىبەرگەن سۋرەتتە قۇتقارۋشىلاردىڭ سول ۋاز كولىگىن ءوز كۇشتەرىمەن جوندەپ جاتقانى كورسەتىلگەن. سونىمەن قاتار قىزمەتكەرلەردىڭ اتالعان كولىكتى جوندەۋ ءۇشىن ارقايسىسى 6 مىڭ تەڭگەدەن اقشا جيناعانىن راستايتىن سۋرەت جىبەرىلگەن.
