الماتى قالاسىندا پوليتسيا قىزمەتكەرلەرى زاڭسىز ساتىلعان الكوگول ونىمدەرىن انىقتاپ، كولەڭكەلى اينالىمعا قارسى كەزەكتى رەيد جۇرگىزدى.
اتالعان شارا پروفيلاكتيكا جىلى اياسىندا، سونداي-اق ىشكى ىستەر ءمينيسترى جاريالاعان «پوليتسيا – زاڭ مەن ءتارتىپتىڭ قورعاۋشىسى» ۇرانى مەن «ۋچاسكە» جەدەل-پروفيلاكتيكالىق ءىس-شاراسى شەڭبەرىندە وتكىزىلدى. رەيد بارىسىندا تۇركسىب اۋدانىنىڭ پوليتسيا قىزمەتكەرلەرى الكوگول ونىمدەرىنىڭ زاڭسىز ساتىلۋىن انىقتاۋعا باسىمدىق بەردى.
تەكسەرۋ جۇمىستارى ۋچاسكەلىك ينسپەكتورلار مەن جەرگىلىكتى تۇرعىنداردان كەلىپ تۇسكەن شاعىمدار نەگىزىندە جۇرگىزىلدى. پوليتسيا قىزمەتكەرلەرى زاڭسىز ساۋدا بولۋى مۇمكىن دەگەن بىرقاتار مەكەنجايلاردى قاراپ، تەكسەرۋ بارىسىندا ءتيىستى ليتسەنزياسىز الكوگول ونىمدەرىن ساتۋ فاكتىلەرىن انىقتادى. زاڭ تالاپتارىن بۇزا وتىرىپ ساتىلعان ىشىمدىك ونىمدەرى تاركىلەنىپ، ساتۋمەن اينالىسقان ازاماتتارعا قاتىستى اكىمشىلىك حاتتامالار تولتىرىلدى.
ءىس ماتەريالدارى سوتقا جولدانىپ، سوت شەشىمىمەن زاڭسىز اينالىمنان الىنعان الكوگول ونىمدەرىن بەلگىلەنگەن تارتىپپەن جويۋ تۋرالى قاۋلى شىعارىلدى. قۇقىق قورعاۋ ورگاندارىنىڭ مالىمەتىنشە، مۇنداي شارالار ەڭ الدىمەن تۇرعىنداردىڭ قاۋىپسىزدىگىن قامتاماسىز ەتۋگە جانە قوعامدىق ءتارتىپتى ساقتاۋعا باعىتتالعان.
تۇركسىب اۋداندىق پوليتسيا باسقارماسىنىڭ باستىعى دۋمان اۋحاديەۆتىڭ ايتۋىنشا، الكوگول ونىمدەرىنىڭ كولەڭكەلى ساۋداسى – قوعامعا تىكەلەي قاۋىپ توندىرەتىن فاكتورلاردىڭ ءبىرى.
«زاڭسىز الكوگول اينالىمىنا قارسى كۇرەس – پروفيلاكتيكالىق جۇمىستىڭ نەگىزگى باعىتتارىنىڭ ءبىرى. بۇل تەك باقىلاۋ نەمەسە تەكسەرىس ەمەس، بۇل – ادامداردىڭ دەنساۋلىعى مەن قوعامدىق قاۋىپسىزدىگى ماسەلەسى. مۇنداي زاڭبۇزۋشىلىقتارعا جول بەرمەيمىز جانە ءاربىر دەرەك بويىنشا قاتاڭ شارا قولدانامىز»، – دەدى ول.
الماتى قالاسىنىڭ پوليتسيا دەپارتامەنتى تۇرعىنداردى زاڭسىز الكوگول ونىمدەرىن ساتىپ الماۋعا جانە مۇنداي قۇقىقبۇزۋشىلىقتارعا كۋا بولعان جاعدايدا ءتيىستى ورگاندارعا حابارلاۋعا شاقىرادى. زاڭسىز الكوگول ساتۋ قازاقستان رەسپۋبليكاسىنىڭ زاڭناماسىنا سايكەس اكىمشىلىك جاۋاپكەرشىلىككە اكەلەتىنى ەسكەرتىلدى.
