رەسەي فەدەراتسياسى قۇرامىنداعى شەشەنستان رەسپۋبليكاسىنىڭ باسشىسى رامزان قادىروۆ 20 جاستاعى ۇلى احمات قادىروۆتى رەسپۋبليكا ۇكىمەتى توراعاسىنىڭ ورىنباسارى مىندەتىن اتقارۋشى قىزمەتىنە تاعايىندادى، دەپ حابارلايدى "ادىرنا" ۇلتتىق پورتالى.
مالىمەتكە سايكەس، احمات قادىروۆ جاڭا قىزمەتىمەن قاتار شەشەنستاننىڭ سپورت ءمينيسترى قىزمەتىن دە قاتار الىپ جۇرمەك.
سونىمەن قاتار شەشەنستاننىڭ ۇلتتىق ساياسات، سىرتقى بايلانىستار، ءباسپاسوز جانە اقپارات ءمينيسترى احمەد دۋداەۆتىڭ دا قىزمەتى جوعارىلاعان. رامزان قادىروۆ بۇل كادرلىق وزگەرىستەر ۇكىمەت باسشىسى ماگومەد داۋدوۆتىڭ ۇسىنىسىمەن جۇزەگە اسقانىن ايتىپ، ولاردى «كادر ماسەلەسىندەگى شاعىن وزگەرىستەر» دەپ اتادى. بۇل تۋرالى ول ءوزىنىڭ Telegram-ارناسىندا جازدى.
شەشەنستان باسشىسى ۇلىنىڭ قىزمەتتىك ءوسۋىن ءوزىنىڭ دەنساۋلىعىنا بايلانىستىرىپ جاتقان اقپاراتتاردى رەسمي تۇردە راستاعان جوق. بۇعان دەيىن كەيبىر باق-تا رامزان قادىروۆتىڭ جاڭا جىل قارساڭىندا ماسكەۋدە اۋرۋحاناعا تۇسكەنى جونىندە حابار تاراعانىمەن، بۇل دەرەك رەسمي تۇردە راستالماعان.
ايتا كەتەيىك، قادىروۆ اۋلەتىنىڭ وزگە دە مۇشەلەرى شەشەنستان بيلىك قۇرىلىمدارىندا جوعارى لاۋازىمداردى يەلەنىپ وتىر. ماسەلەن، ونىڭ قىزى حاديجات 24 جاسىندا شەشەنستان باسشىسى مەن ۇكىمەتى اكىمشىلىگى جەتەكشىسىنىڭ ءبىرىنشى ورىنباسارى قىزمەتىنە تاعايىندالعان. احمات قادىروۆ بۇعان دەيىن 18 جاسىندا سپورت ءمينيسترىنىڭ ورىنباسارى، جاستار ءىسى جونىندەگى مينيستر جانە «احمات» فۋتبول كلۋبىنىڭ پرەزيدەنتى بولعان.
ال قادىروۆتىڭ تاعى ءبىر ۇلى ادام 16 جاسىندا اكەسىنىڭ قاۋىپسىزدىگىن قامتاماسىز ەتۋ قۇرىلىمىن باسقارعان، كەيىن گۋدەرمەس قالاسىنداعى ۆلاديمير پۋتين اتىنداعى رەسەيدىڭ ارنايى ماقساتتاعى ۋنيۆەرسيتەتىنىڭ كۋراتورى بولىپ تاعايىندالعان.
