اقش پرەزيدەنتى دونالد ترامپ يرانمەن ساۋدا قاتىناسىن جۇرگىزەتىن بارلىق ەلدەرگە 25 پايىزدىق كەدەندىك باج سالىعىن ەنگىزەتىنىن مالىمدەدى، دەپ حابارلايدى "ادىرنا" ۇلتتىق پورتالى.
ترامپ اقپاراتتى Truth Social الەۋمەتتىك جەلىسىندە جازدى.
«وسى ساتتەن باستاپ يسلام رەسپۋبليكاسىمەن — يرانمەن — بيزنەس جۇرگىزەتىن كەز كەلگەن ەل اقش-پەن جاسالاتىن بارلىق كوممەرتسيالىق وپەراتسيالار ءۇشىن 25 پايىزدىق باج سالىعىن تولەيدى. بۇل شەشىم تۇپكىلىكتى جانە قايتا قاراۋعا جاتپايدى»، — دەپ جازدى اق ءۇي باسشىسى 12 قاڭتاردا.
دونالد ترامپتىڭ ايتۋىنشا، بۇل شارا يران ۇكىمەتىنە قىسىم كورسەتۋ ماقساتىندا قابىلدانعان. اق ءۇي باسشىسى بيلىكتىڭ ەل ىشىندەگى نارازىلىق اكتسيالارىن كۇشپەن باسىپ-جانشىپ وتىرعانىن اتاپ ءوتىپ، بۇعان دەيىن نارازىلىق بىلدىرۋشىلەرگە كومەكتەسەتىنىن مالىمدەگەن بولاتىن.
Bloomberg اگەنتتىگىنىڭ مالىمەتىنشە، يراننىڭ نەگىزگى ساۋدا سەرىكتەستەرى قاتارىندا ءۇندىستان، قىتاي جانە تۇركيا بار. اگەنتتىك اتاپ وتكەندەي، قىتاي ونىمدەرىنە قوسىمشا 25 پايىزدىق تاريف ەنگىزۋ دونالد ترامپتىڭ وتكەن جىلدىڭ سوڭىندا قحر توراعاسى سي تسزينپينمەن جاساعان ساۋدا ء«بىتىمىن» بۇزۋى مۇمكىن.
ال ورتالىق ازيا ەلدەرى يرانمەن ساۋدا-ەكونوميكالىق بايلانىستارىن نىعايتىپ كەلەدى. 2024 جىلى يران مەن قازاقستان اراسىنداعى تاۋار اينالىمى 340 ملن اقش دوللارىن قۇرادى. قىرعىزستانمەن اراداعى ساۋدا كولەمى 58,5 ملن دوللار بولسا، تاجىكستانمەن – 377,7 ملن دوللارعا جەتكەن.
تۇرىكمەنستانمەن ساۋدا اينالىمى شامامەن 600 ملن دوللاردى قۇراسا، وزبەكستانمەن بۇل كورسەتكىش 500 ملن دوللارعا جۋىقتادى.
2025 جىلى ورتالىق ازيا مەملەكەتتەرى يرانمەن اراداعى تاۋار اينالىمىن جاقىن بولاشاقتا 2–3 ملرد اقش دوللارىنا دەيىن جەتكىزۋ جونىندە كەلىسىمگە كەلگەن.
اتاپ ايتقاندا، مامىر ايىندا وتكەن وزبەك-يران بيزنەس-فورۋمى قورىتىندىسى بويىنشا ەكى ەلدىڭ كاسىپكەرلەرى جالپى سوماسى 1 ملرد دوللارعا جۋىق كەلىسىمدەرگە قول قويدى.
