باس پروكۋراتۋرا سوت سانكتسياسىنسىز ۇستاۋ مەرزىمىن 72 ساعاتتان 48 ساعاتقا قىسقارتۋ تۋرالى ۇسىنىستى قولدامادى، دەپ حابارلايدى “ادىرنا” ۇلتتىق پورتالى.
بۇل تۋرالى كونستيتۋتسيالىق كوميسسيانىڭ ەكىنشى وتىرىسىندا باس پروكۋروردىڭ ورىنباسارى جاندوس ومىراليەۆ مالىمدەگەن.
ونىڭ ايتۋىنشا، كونستيتۋتسيادا ادام مەن ازاماتتىڭ قۇقىقتارى مەن بوستاندىقتارىنا قاتىستى نەگىزگى كەپىلدىكتەر قازىردىڭ وزىندە بەكىتىلگەن. ال ۇستاۋدىڭ ناقتى 48 ساعاتتىق مەرزىمىن جانە ونى ەرەكشە جاعدايلاردا ۇزارتۋ نەگىزدەرىن اتا زاڭدا ناقتىلاۋ ارتىق بولماق.
«قولدانىستاعى تەرگەۋ-سوت تاجىريبەسى كۇدىكتىلەردى 24–36 ساعات ىشىندە بوساتۋعا مۇمكىندىك بەرىپ وتىر. ال ناقتى مەرزىمدى كونستيتۋتسيادا بەكىتۋ بولاشاقتاعى رەفورمالاردى قيىنداتادى»، – دەدى جاندوس ومىراليەۆ.
ول الداعى ۋاقىتتا ۇستاۋ مەرزىمىن ودان ءارى قىسقارتۋ قاجەتتىلىگى تۋىنداسا، كونستيتۋتسياعا وزگەرىس ەنگىزۋ كۇردەلى راسىمدەردەن ءوتۋدى تالاپ ەتەتىنىن، بۇل زاڭنامانىڭ يكەمدىلىگىن شەكتەيتىنىن اتاپ ءوتتى.
سونىمەن قاتار باس پروكۋراتۋرا كونستيتۋتسيادا باسقا دا قۇقىقتىق نورمالاردى بەكىتۋدى قولدايتىنىن جەتكىزدى. اتاپ ايتقاندا، كۇدىكتىگە قۇقىقتارى مەن ايىپ تاعۋ نەگىزدەرى تۇسىندىرىلمەگەن جاعدايدا تەرگەۋ ارەكەتتەرىن زاڭسىز دەپ تانۋدى كوزدەيتىن ميراندا قاعيداتىن ەنگىزۋ باستاماسى قولداۋ تاپتى.
سونداي-اق، ادام ۇستالعان ساتتەن باستاپ ادۆوكاتتىڭ مىندەتتى تۇردە قاتىسۋى قاجەت ەكەنى ايتىلدى.
«ادامعا كۇدىكتى مارتەبەسى بەرىلگەن العاشقى ساتتەن باستاپ ونىڭ بىلىكتى قورعاۋعا قۇقىعى قامتاماسىز ەتىلۋى ءتيىس. وكىنىشكە قاراي، تاجىريبەدە كوپتەگەن ازاماتتار ءوز قۇقىقتارىن تولىق بىلە بەرمەيدى»، – دەدى باس پروكۋروردىڭ ورىنباسارى.
