رەسەيدىڭ مەملەكەتتىك كورپوراتسياسى «روساتوم» وزبەكستاندا شاعىن قۋاتتى اتوم ەلەكتر ستانتسياسى نەگىزىندە اتوم كلاستەرىن» قۇرۋدى ۇسىندى. بۇل تۋرالى كورپوراتسيانىڭ باس ديرەكتورى الەكسەي ليحاچەۆ مالىمدەدى، دەپ حابارلايدى «ادىرنا» ءتىلشىسى.
ء«بىز بەلگىلى ءبىر جاڭاشىلدىققا بارىپ، وزبەكستان باسشىلىعىنا تەك اتوم ستانتسياسىنا قىزمەت كورسەتەتىن قالاشىقتى ەمەس، اتوم ەنەرگەتيكاسىمەن قاتار اتوم مەديتسيناسى، اۋىل شارۋاشىلىعى، دەنساۋلىق ساقتاۋ جانە ماتەريالتانۋ سالالارىنا ارنالعان راديولوگيالىق قۇزىرەتتەر قامتىلاتىن اتوم كلاستەرىن قۇرۋدى ۇسىندىق. ارينە، بۇل جۇمىسقا ءبىزدىڭ نەگىزگى عىلىمي ۇيىمىمىز – كۋرچاتوۆ ينستيتۋتى دا قوسىلدى»، – دەدى ليحاچەۆ «روسسيا-24» تەلەارناسىنا بەرگەن سۇحباتىندا.
كورپوراتسيا باسشىسى بۇل كەشەن ءۇشىن تسيفرلىق ونەركاسىبى، تسيفرلىق شەشىمدەرى جانە دەرەكتەردى وڭدەۋ ورتالىعى قاجەت بولاتىنىن دا اتاپ ءوتتى.
«وسىلايشا ءبىز تەك پايدالانۋشى ۇيىمعا ارنالعان شاعىن قالاشىق تۋرالى ەمەس، الداعى ونجىلدىقتاردا 20–30 مىڭ ادامعا دەيىنگى حالقى بار تولىققاندى يننوۆاتسيالىق اتوم، يادرولىق كلاستەر قۇرۋ تۋرالى ايتىپ وتىرمىز»، – دەدى ليحاچەۆ.
27 قاڭتار كۇنى «روساتوم» باس ديرەكتورىن وزبەكستان پرەزيدەنتى شاۆكات ميرزيوەۆ قابىلداعان ەدى. كەزدەسۋ بارىسىندا ەلدە اتوم ەلەكتر ستانتسياسىن سالۋ جانە اتوم سالاسىنداعى وزگە دە ىنتىماقتاستىق باعىتتارى تالقىلانعان.
«الاڭدا جۇمىستار بەلسەندى ءجۇرىپ جاتىر. 2025 جىلدىڭ قازان ايىندا شاعىن قۋاتتى العاشقى ەنەرگيا بلوگىنا ارنالعان قازانشۇڭقىردى قازۋ باستالدى. بيىلعى جىلدىڭ باستى مىندەتى – يادرولىق ارال عيماراتتارىنىڭ ىرگەتاس تاقتاسىنىڭ نەگىزىنە بەتون قۇيۋ كەزەڭىنە كوشۋ. مەرزىمدەردىڭ ماڭىزدىلىعىن ەسكەرە وتىرىپ، بەتون دايىنداۋ جۇمىستارىن وسى كوكتەمدە باستاۋدى كوزدەپ وتىرمىز»، – دەدى ليحاچەۆ.
وزبەكستان مەن رەسەي اراسىنداعى اتوم ەنەرگەتيكاسى سالاسىنداعى ىنتىماقتاستىق، سونىڭ ىشىندە العاشقى وزبەك اەس-ءىن سالۋدى كوزدەيتىن كەلىسىم 2017 جىلعى جەلتوقساندا قول قويىلعان. قۇنى 11 ملرد دوللار بولاتىن العاشقى ەنەرگيا بلوگىن 2028 جىلى ىسكە قوسۋ جوسپارلانعان ەدى. ول كەزدە اەس كەشەنى قۋاتى ارقايسىسى 1200 مۆت بولاتىن ەكى ەنەرگيا بلوگىنان تۇرادى دەپ بولجانعان. كەيىنىرەك الدىمەن شاعىن قۋاتتى اتوم ستانتسياسىن سالۋ تۋرالى شەشىم قابىلدانعان.
