«قازاقستان زاڭگەرلەر وداعى» رەسپۋبليكالىق قوعامدىق بىرلەستىگىنىڭ توراعاسى سەرىك اقىلباي كونستيتۋتسيالىق كوميسسيانىڭ بەسىنشى وتىرىسىندا اتا زاڭعا ەنگىزۋگە ۇسىنىلعان وزگەرىستەردىڭ كولەمى مەن تەرەڭدىگى قولدانىستاعى قۇجاتقا تۇزەتۋ عانا ەمەس، شىن مانىندە جاڭا كونستيتۋتسيانى قابىلداۋ تۋرالى ءسوز قوزعاۋعا مۇمكىندىك بەرەدى دەگەن پىكىر ءبىلدىردى.
سەرىك اقىلبايدىڭ ايتۋىنشا، تۇزەتۋلەردىڭ بۇل جوباسى كونستيتۋتسيالىق قۇرىلىستىڭ ىرگەلى نەگىزدەرىن قوزعايتىن نورمالاردىڭ ايتارلىقتاي جيىنتىعىنان تۇرادى.
اتاپ ايتقاندا، جاڭا ينستيتۋتسيونالدىق ارحيتەكتۋرا قالىپتاسۋدا: ءبىر پالاتالى پارلامەنت، حالىق كەڭەسى، ۇكىمەت قىزمەتىنىڭ، سوت جۇيەسى مەن قۇقىق قورعاۋ تەتىكتەرىنىڭ جاڭارتىلعان مودەلدەرى.
«ۇسىنىستاردىڭ اۋقىمى مەن تەرەڭدىگىن سارالاي كەلە قولدانىستاعى كونستيتۋتسيانىڭ جاڭا رەداكتسياسى تۋرالى ەمەس، شىن مانىندە جاڭا اتا زاڭ تۋرالى ايتقان ءجون دەپ سانايمىن»، – دەدى سەرىك اقىلباي.
ونىڭ ايتۋىنشا، بۇگىندە مەملەكەت پەن قوعامنىڭ باسقارۋ تيىمدىلىگىنە، قۇقىق ايقىندىلىعى مەن ادام قۇقىقتارىن قورعاۋعا قوياتىن تالابى جوعارى. وسىعان بايلانىستى رەسپۋبليكادا بيلىكتى ۇيىمداستىرۋ نەگىزدەرى وزگەرىپ، جاڭا ينستيتۋتتار قالانۋدا. وسىلايشا، ءبىز قازاقستاننىڭ كونستيتۋتسيالىق دامۋىنىڭ ساپالى جاڭا كەزەڭى تۋرالى ايتىپ وتىرمىز.
سونىمەن قاتار ول جاڭا كونستيتۋتسيا مەملەكەتتىلىكتىڭ نەگىزگى قۇندىلىقتارىنىڭ تولىق ساباقتاستىعىن جانە جيناقتالعان قۇقىق قولدانۋ تاجىريبەسىن ەسكەرە وتىرىپ، ولاردىڭ دايەكتى دامۋىن قامتاماسىز ەتەتىنىن اتاپ ءوتتى.
سونداي-اق سەرىك اقىلباي كونستيتۋتسيادا ءدىندى مەملەكەتتەن ءبولۋدى تىكەلەي بەكىتۋ بويىنشا جيىنتىق جوباعا ناتيجەسىندە ەنگەن ۇسىنىسىن ەسكە سالدى.
«قازاقستان اۋماعىنداعى ءدىني ۇيىمداردىڭ قىزمەتى زاڭعا سايكەس جۇزەگە اسىرىلاتىنىن جانە كونستيتۋتسيالىق قۇرىلىستىڭ نەگىزدەرىن قورعاۋ، ۇلتتىق قاۋىپسىزدىكتى قامتاماسىز ەتۋ، قوعامدىق ءتارتىپتى، ادامنىڭ قۇقىقتارى مەن بوستاندىقتارىن، حالىقتىڭ دەنساۋلىعىن، قوعامنىڭ رۋحاني-ادامگەرشىلىك قۇندىلىقتارىن قورعاۋ ماقساتىندا شەكتەلۋى مۇمكىندىگىن قوسىمشا بەكىتۋ قاجەت دەپ سانايمىن. مۇنداي تولىقتىرۋلار يدەيانىڭ تۇپكى ءمانىن اشادى»، – دەدى ول.
سونىمەن بىرگە ول ادۆوكاتۋرانىڭ مارتەبەسىنە قاتىستى نورمانى قوسىمشا پىسىقتاۋدىڭ ماڭىزىن اتاپ ءوتتى.
«تۇجىرىمدامالار بارىنشا سالماقتى جانە ازاماتتاردىڭ قۇقىقتارى مەن بوستاندىقتارىن قامتاماسىز ەتۋ مىندەتتەرىنە تولىق سايكەس كەلۋى ءۇشىن ءالى دە جۇمىس جاساۋ كەرەك»، – دەدى سەرىك اقىلباي.
جالپى، ول كوميسسيا دۇرىس باعىتتا جۇمىس اتقارىپ جاتىر دەگەن پىكىر ءبىلدىردى.
