ۇلكەن الماتى شاتقالىندا پايدا بولعان ءىلبىستى قورعاۋ ءۇشىن قر عجبم زوولوگيا ينستيتۋتىنىڭ تەريولوگ-عالىمدارى مەن ىلە-الاتاۋ ۇلتتىق تابيعي پاركىنىڭ قىزمەتكەرلەرى بىرنەشە كۇن بويى ۇزدىكسىز جۇمىس جۇرگىزدى، دەپ حابارلايدى "ادىرنا".
مامانداردىڭ ايتۋىنشا، جىرتقىشتى كورۋگە ۇمتىلعان ادامداردىڭ كوپتەپ جينالۋى جانۋارعا دا، ادامداردىڭ وزىنە دە قاۋىپ توندىرەدى.
«الماتى تۇرعىندارىنىڭ جاساعانى ەتيكالىق ءارى مورالدىق شەكتەن شىقتى! ءىلبىستى ءوز كوزىمەن كورگىسى كەلەتىن ادامدار جانۋارعا قانشالىقتى زيان كەلتىرىپ جاتقانىن، سونىمەن قاتار ءوز ومىرلەرىن ۇلكەن قاۋىپكە تىگىپ وتىرعانىن مۇلدە ويلامايدى.
ءىلبىس — ءىرى جىرتقىش. ول ينستينكتيۆتى تۇردە ءوز ولجاسىن قورعايدى جانە ادامعا شابۋىل جاساۋى مۇمكىن.
بۇل جاعدايدا شابۋىل ارانداتىلعان بولار ەدى، مۇندا جىرتقىشتى كىنالاۋعا بولمايدى — كىنا ادامداردىڭ وزىندە»، - دەيدى قر زوولوگيا ينستيتۋتىنىڭ تەريولوگيا زەرتحاناسىنىڭ مەڭگەرۋشىسى، سونىمەن قاتار “Snow Leopard Foundation” قار بارىسىن ساقتاۋ قورىنىڭ اتقارۋشى ديرەكتورى الەكسەي الەكساندروۆيچ گراچەۆ Zakon.kz سايتىنا بەرگەن سۇحباتىندا.
قازاقستان رەسپۋبليكاسىندا قابىلدانعان جابايى جانۋارلاردى تەكسەرۋ حاتتامالارىنا سايكەس، زوولوگيا ينستيتۋتىنىڭ تەريولوگ-ماماندارى ۆەتەرينارلارمەن جانە «ىلە-الاتاۋ» ۇلتتىق پاركىنىڭ قىزمەتكەرلەرىمەن بىرلەسە وتىرىپ، ءىلبىستىڭ جالپى جاعدايىن تەكسەرىپ، قاجەتتى تالداۋلاردى الدى.
سونداي-اق، ونىڭ قوزعالىس جولدارىن، مىنەز-قۇلقىن باقىلاۋ جانە قورعاۋ ماقساتىندا سپۋتنيكتىك قارعىباۋ (وشەينيك) ورناتىلدى.
قازىرگى ۋاقىتتا قار بارىسى بۇل اۋماقتان امان-ەسەن كەتىپ، باسقا جەرگە قونىس اۋداردى. الايدا اتالعان وقيعاعا دەگەن قىزىعۋشىلىق ءالى دە باسىلعان جوق، ادامدار شاتقالعا جاپپاي بارىپ جاتىر.
ايتا كەتەيىك، قازاقستاندا قار بارىسىن قورعاۋ جانە مونيتورينگ جۇرگىزۋ بويىنشا اتقارىلعان جۇيەلى جۇمىستاردىڭ ناتيجەسىندە سوڭعى 30 جىلدا بۇل جىرتقىشتىڭ سانى ارتقان. قازىرگى تاڭدا ەلىمىزدە شامامەن 190 ءىلبىس مەكەندەيدى.
ماماندار تاۋلار تەك دەمالىس ورنى عانا ەمەس، قىزىل كىتاپقا ەنگەن سيرەك جانۋارلاردىڭ تابيعي مەكەنى ەكەنىن ەسكە سالىپ، تۇرعىنداردى جابايى اڭدارعا جاقىنداماۋعا، شۋلاماۋعا، قورەكتەندىرمەۋگە جانە تابيعاتتى لاستاماۋعا شاقىرادى.
ءىلبىس – الماتىنىڭ سيمۆولى. ونىڭ بولاشاعى ءاربىر ازاماتتىڭ جاۋاپكەرشىلىگىنە بايلانىستى.
