قىرعىز رەسپۋبليكاسىنىڭ مينيسترلەر كابينەتى ەلدىڭ ۇلتتىق سيمۆولى رەتىندە قار بارىسىن ء(ىلبىس) رەسمي تۇردە بەكىتتى، دەپ حابارلايدى "ادىرنا" ۇلتتىق پورتالى.
قۇجاتقا سايكەس، قار بارىسىنىڭ بەينەسى بار رەسمي لوگوتيپ پەن ونى پايدالانۋ ءتارتىبى بەكىتىلدى. بۇل شەشىم 2023 جىلدىڭ 29 جەلتوقسانىنداعى پرەزيدەنت جارلىعىن ىسكە اسىرۋ ماقساتىندا قابىلدانعان. جارلىقتىڭ باستى ماقساتى – قىرعىزستاننىڭ تابيعي جانە مادەني مۇراسىن بەينەلەيتىن ۇلتتىق سيمۆولداردى ساقتاۋ، قورعاۋ جانە كەڭىنەن ناسيحاتتاۋ.
مينيسترلەر كابينەتى تابيعي رەسۋرستار، ەكولوگيا جانە تەحنيكالىق قاداعالاۋ مينيسترلىگىنە قار بارىسىنىڭ پوپۋلياتسياسىن ساقتاۋ مەن ونىڭ تىرشىلىك ەتۋ ايماعىن قورعاۋ جونىندەگى ءىس-شارالار جوسپارىن ازىرلەۋدى تاپسىردى.
سونىمەن قاتار، بارلىق مەملەكەتتىك ورگاندارعا، جەرگىلىكتى ءوزىن-ءوزى باسقارۋ قۇرىلىمدارىنا جانە ۇيىمدارعا وسى قاۋلىنى باسشىلىققا الۋ مىندەتتەلدى.
قار بارىسى – قىرعىزستان تاۋلارىنىڭ ەجەلگى مەكەندەۋشىسى ءارى ەركىندىك پەن قايسارلىقتىڭ سيمۆولى. ونىڭ بەينەسى ەلدىڭ ەكولوگيالىق جاۋاپكەرشىلىگىن جانە تابيعاتتى قورعاۋعا دەگەن ۇلتتىق ۇمتىلىسىن بىلدىرەدى.
قاۋلى رەسمي جاريالانعان كۇنىنەن باستاپ زاڭدى كۇشىنە ەندى.
