ورالداعى جىلۋ ەلەكتر ورتالىعىندا جاپوندىق «Hitachi» كومپانياسىنىڭ گاز تۋربينالىق قوندىرعىسى كۇردەلى جوندەۋدەن سوڭ ىسكە قوسىلدى. سالتاناتتى راسىمگە وبلىس اكىمى ناريمان تورەعاليەۆ قاتىستى.
قۋاتى 28 مۆت بولاتىن گاز تۋربينالى قوندىرعى وسىدان 20 جىل بۇرىن ورناتىلعان. 2019 جىلى جوسپارلى ينسپەكتسيالىق تەكسەرىس جۇرگىزىلگەنىمەن، تەحنيكالىق جوندەۋ جۇمىستارى كەستەدەن كەشىكتى. ماڭىزدى ماسەلە وبلىس اكىمى ناريمان تورەعاليەۆتىڭ تىكەلەي ارالاسۋىمەن وڭ شەشىلدى. 2023 جىلى ايماق باسشىسى باستاعان باتىسقازاقستاندىق دەلەگاتسيا جاپونيا ەلىندە بولىپ، تۋربينانى ءوندىرۋشى زاۋىتتىڭ وكىلدەرىمەن دەلدالسىز ديدارلاستى. قوس تاراپ قوندىرعىنىڭ قوسالقى بولشەكتەرىن دايىنداۋ جانە جەتكىزۋ بويىنشا كەلىسىمشارت جاساستى. كۇردەلى جوندەۋ جۇمىستارىن اتىراۋلىق كومپانيا جۇزەگە اسىردى.
مەملەكەت باسشىسىنىڭ ەنەرگەتيكالىق ينفراقۇرىلىمدى جاڭعىرتۋ ساياساتى اياسىندا كەيىنگى ەكى جىلدا بۇل سالاعا بيۋدجەتتەن 15,6 ملرد تەڭگە باعىتتالدى. 2035 جىلعا دەيىنگى ارالىقتى قامتيتىن، 32 جوبادان تۇراتىن جول كارتاسى اياسىندا سورعى ستانتسيالارى، جاڭا قازاندىقتار سالىنىپ، قالانىڭ نەگىزگى جىلۋ ماگيسترالدارى جاڭارتىلىپ جاتىر. قازىرگى ۋاقىتتا №6 جانە №7 جىلۋ جەلىلەرىن جاڭعىرتۋ بويىنشا دا اۋقىمدى جۇمىستار جۇرگىزىلۋدە.
وبلىس اكىمى اتقارىلىپ جاتقان كەشەندى ءىس-شارالار ءوڭىردىڭ ەنەرگەتيكالىق قاۋىپسىزدىگىن نىعايتىپ، كوممۋنالدىق سەكتوردىڭ سەنىمدىلىگىن جاڭا دەڭگەيگە كوتەرەتىنىن ايتتى. سونداي-اق سالانى تسيفرلاندىرۋدىڭ ماڭىزىن اتاپ ءوتتى.
- كۇنى كەشە «WEST OIL» كومپانياسىنىڭ وكىلدەرىمەن كەزدەسىپ، ماڭىزدى جوبالاردى پىسىقتادىم. بولاشاقتا قالانى سۋمەن جانە جىلۋمەن جابدىقتاۋ جۇيەلەرى تولىق اۆتوماتتاندىرىلادى. باسقارۋ ورتالىعى وسى مەكەمەدە ورنالاسىپ، ماماندار تاۋلىك بويى مونيتورينگ جۇرگىزەدى. مۇنداي تسيفرلىق شەشىمدەر كەز كەلگەن اقاۋدى جەدەل انىقتاپ، كوممۋنالدىق كاسىپورىنداردىڭ ۇزدىكسىز قىزمەتىن قامتاماسىز ەتۋگە مۇمكىندىك بەرەدى، - دەدى وبلىس اكىمى.
