باتىس قازاقستان وبلىسىنىڭ اكىمى ناريمان تورەعاليەۆ لياونين پروۆينتسياسى پارتيا كوميتەتىنىڭ حاتشىسى سيۋي كۋنلينمەن كەزدەستى. قوس تاراپ ەكى ەل كوشباسشىلارىنىڭ باسشىلىعىمەن قازاقستان مەن قىتاي اراسىنداعى ستراتەگيالىق سەرىكتەستىك پەن جان-جاقتى ىنتىماقتاستىقتىڭ جوعارى دەڭگەيىن اتاپ ءوتتى. بۇگىندە وڭىرارالىق بايلانىستار، سونىڭ ىشىندە ساۋدا-ەكونوميكالىق جانە مادەني-گۋمانيتارلىق قارىم-قاتىناس جاڭا دەڭگەيگە كوتەرىلىپ كەلەدى.
سيۋي كۋنلين شاقىرۋدى قابىل العانى ءۇشىن ايماق باسشىسىنا ريزاشىلىعىن ءبىلدىردى. ول بىلتىر تسزيانسۋ پروۆينتسياسىندا باستالعان ەكىجاقتى تانىستىقتىڭ ناتيجەلى بولعانىن تىلگە تيەك ەتىپ، بۇل سەرىكتەستىك الداعى ۋاقىتتا تۇراقتى ءارى سەرپىندى جالعاساتىنىنا سەنىم ءبىلدىردى.
وبلىس اكىمى ناريمان تورەعاليەۆ مەملەكەت باسشىسى قاسىم-جومارت توقاەۆتىڭ تىكەلەي شەتەلدىك ينۆەستيتسيا تارتۋ جانە ينۆەستيتسيالىق تارتىمدىلىقتى ارتتىرۋ جونىندەگى تاپسىرمالارىنا سايكەس ايماقتا اۋقىمدى جۇمىستار اتقارىلعانىن اتاپ ءوتتى.
- بۇگىنگى تاڭدا باتىس قازاقستان وبلىسى مەن قىتاي حالىق رەسپۋبليكاسىنىڭ ستراتەگيالىق سەرىكتەستىگى بەكي ءتۇستى. 2025 جىلدىڭ قورىتىندىسى بويىنشا ءبىزدىڭ ءوڭىر مەن قىتاي اراسىنداعى سىرتقى ساۋدا اينالىمىنىڭ كولەمى 175 ملن اقش دوللارىن قۇرادى، بۇل 2024 جىلعى كورسەتكىشتەن 1,5 ەسە كوپ. تسزيانسۋ پروۆينتسياسىندا حالىق ۇكىمەتىنىڭ توراعاسى بولعانىڭىزدا سىزبەن كەزدەسىپ، بىرقاتار باعىت بويىنشا كەلىسىمدەرگە كەلگەن ەدىك. سونىڭ اياسىندا ناقتى جوبالار ىسكە اسىرىلىپ جاتىر. تاياۋ ارادا لياونين پروۆينتسياسىمەن دە تۇراقتى بايلانىس بەكيدى دەگەن سەنىم مول، - دەدى ناريمان تورەعاليەۆ.
ايماق باسشىسى باتىس قازاقستان وبلىسىنىڭ لوگيستيكالىق الەۋەتى مەن ينۆەستورلار ءۇشىن جاسالعان قولايلى جاعدايلاردى اتاپ ءوتىپ، بىرلەسكەن جوبالاردى جۇزەگە اسىرۋعا دايىن ەكەنىن جەتكىزدى.
