Oraldaǧy jylu elektr ortalyǧynda japondyq «Hitachi» kompaniiasynyŋ gaz turbinalyq qondyrǧysy kürdelı jöndeuden soŋ ıske qosyldy. Saltanatty räsımge oblys äkımı Nariman Töreǧaliev qatysty.
Quaty 28 MVt bolatyn gaz turbinaly qondyrǧy osydan 20 jyl būryn ornatylǧan. 2019 jyly josparly inspeksiialyq tekserıs jürgızılgenımen, tehnikalyq jöndeu jūmystary kesteden keşıktı. Maŋyzdy mäsele oblys äkımı Nariman Töreǧalievtıŋ tıkelei aralasuymen oŋ şeşıldı. 2023 jyly aimaq basşysy bastaǧan batysqazaqstandyq delegasiia Japoniia elınde bolyp, turbinany öndıruşı zauyttyŋ ökılderımen deldalsyz didarlasty. Qos tarap qondyrǧynyŋ qosalqy bölşekterın daiyndau jäne jetkızu boiynşa kelısımşart jasasty. Kürdelı jöndeu jūmystaryn atyraulyq kompaniia jüzege asyrdy.
Memleket basşysynyŋ energetikalyq infraqūrylymdy jaŋǧyrtu saiasaty aiasynda keiıngı ekı jylda būl salaǧa biudjetten 15,6 mlrd teŋge baǧyttaldy. 2035 jylǧa deiıngı aralyqty qamtityn, 32 jobadan tūratyn Jol kartasy aiasynda sorǧy stansiialary, jaŋa qazandyqtar salynyp, qalanyŋ negızgı jylu magistraldary jaŋartylyp jatyr. Qazırgı uaqytta №6 jäne №7 jylu jelılerın jaŋǧyrtu boiynşa da auqymdy jūmystar jürgızılude.
Oblys äkımı atqarylyp jatqan keşendı ıs-şaralar öŋırdıŋ energetikalyq qauıpsızdıgın nyǧaityp, kommunaldyq sektordyŋ senımdılıgın jaŋa deŋgeige köteretının aitty. Sondai-aq salany sifrlandyrudyŋ maŋyzyn atap öttı.
- Künı keşe «WEST OIL» kompaniiasynyŋ ökılderımen kezdesıp, maŋyzdy jobalardy pysyqtadym. Bolaşaqta qalany sumen jäne jylumen jabdyqtau jüielerı tolyq avtomattandyrylady. Basqaru ortalyǧy osy mekemede ornalasyp, mamandar täulık boiy monitoring jürgızedı. Mūndai sifrlyq şeşımder kez kelgen aqaudy jedel anyqtap, kommunaldyq käsıporyndardyŋ üzdıksız qyzmetın qamtamasyz etuge mümkındık beredı, - dedı oblys äkımı.
