تۇڭعىش پرەزيدەنتتىڭ كەڭەسشىسى – ءباسپاسوز حاتشىسى ايدوس ۇكىباي 11 اقپاندا سارا نازارباەۆانىڭ دەنساۋلىعىنا قاتىستى تۇسىنىكتەمە بەردى، دەپ حابارلايدى «ادىرنا» ءتىلشىسى.
«سارا نازارباەۆا 2025 جىلدىڭ ءساۋىر ايىنان باستاپ قازاقستان رەسپۋبليكاسى پرەزيدەنتى ءىس باسقارماسى مەديتسينالىق ورتالىعىنىڭ الماتى قالاسىنداعى ۇلتتىق گوسپيتالىندە ەمدەلىپ جاتتى. سول كەزەڭدە ول اۋىر ميوكارد ينفاركتىن باستان كەشىردى. دارىگەرلەر ۇزاق ۋاقىتقا سوزىلعان اۋىر قانت ديابەتى مەن ۇدەمەلى سوزىلمالى بۇيرەك جەتكىلىكسىزدىگى اياسىندا دامىعان جۇرەكتىڭ يشەميالىق اۋرۋىن، جۇرەك جانە وكپە جەتكىلىكسىزدىگىن انىقتادى»،-دەدى ول.
ايتۋىنشا، سارا الپىسقىزى ۇزاق ۋاقىت بويى وكپەنى جاساندى جەلدەتۋ جانە جاساندى بۇيرەك اپپاراتتارىنا قوسىلعان كۇيدە بولعان.
«بيىلعى جىلدىڭ قاڭتار ايىندا جاعدايىنىڭ تۇراقتانۋىنا بايلانىستى ستاتسيونارلىق ەمدەۋ كەزەڭى اياقتالدى. قازىرگى ۋاقىتتا سارا الپىسقىزى الماتى قالاسىندا ءۇي جاعدايىندا دارىگەرلەردىڭ باقىلاۋىندا»،-دەپ تولىقتىردى ءباسپاسوز حاتشىسى.
سارا نازارباەۆا 1941 جىلى 12 اقپاندا تۋعان. بۇگىن 85 جاسقا تولدى.
