قازاقستان الداعى بىرنەشە جىلدا ەت ەكسپورتىن ەكى ەسە ارتتىرۋدى جوسپارلاپ وتىر، دەپ حابارلايدى “ادىرنا” ۇلتتىق پورتالى.
بۇل تۋرالى قازاقستان رەسپۋبليكاسى اۋىل شارۋاشىلىعى مينيسترلىگى ۆيتسە-ءمينيسترى حابارلادى.
امانعالي بەردالين DALA.CAMP ەت فورۋمىندا سالانىڭ الداعى جەتى جىلدىق دامۋ جوسپارى بەكىتىلگەنىن ايتتى.
سوعان سايكەس، ءىرى قارا مال سانى 8,2 ملن باستان 12 ملن باسقا دەيىن كوبەيتىلمەك. ۇساق مال سانى 28 ملن باسقا جەتكىزىلەدى.
سونداي-اق ەت ءوندىرىسى 1,2 ملن توننادان 1,8 ملن تونناعا دەيىن، ال ءسۇت ءوندىرىسى 1,4 ملن توننادان 2,1 ملن تونناعا دەيىن ۇلعايادى دەپ جوسپارلانعان.
امانعالي بەردالين قولدانىستاعى قولداۋ شارالارى جەتكىلىكسىز ەكەنىن ايتىپ، 2026–2030 جىلدارعا ارنالعان جاڭا كەشەندى جوسپار بەكىتىلگەنىن جەتكىزدى. جوسپار اياسىندا فەرمەرلەرگە جىلدىق 5–6% مولشەرلەمەمەن جەڭىلدەتىلگەن نەسيە بەرۋ، الىس جايىلىمداردى يگەرۋ ءۇشىن قۇدىق قازۋ جانە ءموبيلدى ۆاگوندار ساتىپ الۋعا قارجى ءبولۋ، ۆەتەريناريالىق قاۋىپسىزدىكتى كۇشەيتۋ شارالارى قاراستىرىلعان.
فورۋم بارىسىندا Turan مال وسىرۋشىلەر قاۋىمداستىعى توراعاسى جانىبەك كەنجەباەۆ سيىر ەتىنىڭ باعاسى ينۆەستيتسيالىق تارتىمدىلىق ءۇشىن 10–12 مىڭ تەڭگەگە دەيىن جەتۋى مۇمكىن ەكەنىن ايتتى.
