ەسىرتكى قولداندى جانە ەسىرتكى ۇياسىن ۇيىمداستىردى دەگەن ايىپپەن قاماۋعا الىنعان قىزمەتكەر ايىپتى جوققا شىعاردى، دەپ حابارلايدى “ادىرنا” ۇلتتىق پورتالى قازتاگ-قا سىلتەپ.
10 تاۋلىككە اكىمشىلىك قاماۋعا الىنعان ءدىني قىزمەتكەر ياكوۆ ۆورونتسوۆتىڭ قولجازبا حاتىن ونىڭ ادۆوكاتى دياس احمەتوۆ جاريالاعان.
قورعاۋشىنىڭ ايتۋىنشا، حات الماتىداعى اكىمشىلىك قاماۋعا الىنعانداردى ۇستاۋ يزولياتورىندا كەزدەسۋدەن كەيىن، قىزمەتكەردىڭ وتىنىشىمەن تاراتىلعان.
حات ماتىنىندە ۆورونتسوۆ قىلمىستىق قۋدالاۋدى ءوزىنىڭ قازاقستاندا تاۋەلسىز پراۆوسلاۆ شىركەۋىن قۇرۋ ارەكەتىمەن بايلانىستىرادى.
ونىڭ سوزىنشە، سوڭعى ۋاقىتتا وزىنە قاتىستى باقىلاۋ جۇرگىزىلگەن، قىسىم كورسەتىلگەن جانە اشىق تۇردە جازالاۋ تۋرالى ۇندەۋلەر بولعان.
«مەنىڭ ۇيىمدە ەشقانداي پريتون بولعان ەمەس. ۇيىمنەن تابىلعان ۇنتاق ماعان تيەسىلى ەمەس. ونى ادەيى اكەلگەن دەپ ەسەپتەيمىن. سوت ساراپتامانىڭ قاتە قورىتىندىسىنا سۇيەنىپ شەشىم شىعاردى»، – دەلىنگەن حاتتا.
ۆورونتسوۆ سوت شەشىمىمەن كەلىسپەيتىنىن جانە الدا وزىنە قاتىستى «جالعان ۇيىمداستىرىلعان قىلمىستىق تەرگەۋ» بولۋى مۇمكىن ەكەنىن جازعان.
ايتا كەتسەك، ءدىن قىزمەتكەرى 2022 جىلدىڭ اقپان ايىندا رەسەيدىڭ ۋكرايناداعى سوعىسقا قارسى ۇستانىمىن اشىق ءبىلدىرىپ، ۋكرايناداعى بەيبىتشىلىككە شاقىرعان اشىق حاتقا قول قويعان شامامەن 292 پراۆوسلاۆيە ءدىن قىزمەتكەرىنىڭ قاتارىنا قوسىلعاننان كەيىن تانىمال بولدى.
2023 جىلى ول قىزمەتىنەن شەتتەتىلدى، ال 2024 جىلى ءدىن قىزمەتكەرى مارتەبەسىنەن ايىرىلعان ەدى.
سونداي-اق 2024 جىلى ۆورونتسوۆقا قاتىستى قىلمىستىق كودەكستىڭ 141-بابى («ۇلتارالىق ارازدىقتى قوزدىرۋ») بويىنشا قىلمىستىق ءىس قوزعالعان، الايدا كەيىننەن قىلمىس قۇرامى بولماعاندىقتان تەرگەۋ توقتاتىلدى.
بۇعان دەيىن الماتى قالاسىنىڭ مامانداندىرىلعان اۋدانارالىق اكىمشىلىك سوتى بۇرىنعى ءدىني قىزمەتكەر ياكوۆ ۆورونتسوۆتىڭ قالالىق ادىلەت دەپارتامەنتى مەن قازاقستاننىڭ ادىلەت مينيسترلىگىنە قارسى بەرگەن تالاپ-ارىزىن وندىرىسكە قابىلداعانىن حابارلادىق.
بىرنەشە جىل بۇرىن ۆورونتسوۆ قازاقستاندا ورىس پراۆوسلاۆ شىركەۋىنىڭ ماسكەۋ پاتريارحاتىنا باعىنبايتىن دەربەس پراۆوسلاۆ شىركەۋىن قۇرۋعا ارەكەتتەنگەن. ول ادىلەت مينيسترلىگىنە ەكى رەت قۇجات تاپسىرعانىمەن، ول قۇرماق بولعان پريحود تىركەۋدەن وتپەدى..
