الماتىدا اۆتوبۋس جۇرگىزۋشىسىنىڭ دەنساۋلىعى جول ۇستىندە ناشارلاپ، رولگە يە بولا الماي جول اپاتىنا ۇشىراعان. اۆتوبۋس جۇرگىزۋشىسى وقيعادان سوڭ قايتىس بولدى، دەپ حابارلايدى "ادىرنا".
قالالىق پوليتسيا دەپارتامەنتىنىڭ ءباسپاسوز قىزمەتى وقيعانىڭ 22 ماۋسىمدا جەتىسۋ اۋدانىندا بولعانىن ايتىپ بەردى.
«131-مارشرۋتتاعى اۆتوبۋس جۇرگىزۋشىسى جانگەلدين كوشەسىمەن وڭتۇستىك باعىتتا كەلە جاتىپ، Mercedes جانە Toyota اۆتوكولىكتەرىمەن سوقتىعىسۋعا جول بەرگەن. الدىن الا مالىمەتتەر بويىنشا، قوزعالىس كەزىندە اۆتوبۋس جۇرگىزۋشىسىنىڭ دەنساۋلىعى ناشارلاپ، سونىڭ سالدارىنان ول باسقارۋعا يە بولا الماي قالعان. وكىنىشكە قاراي، جۇرگىزۋشى قايتىس بولدى»، – دەلىنگەن اقپاراتتا.
وقيعا فاكتىسى بويىنشا ساراپتاما تاعايىندالدى. قازىرگى ۋاقىتتا وقيعانىڭ ءمان-جايلارى مەن سەبەپتەرى انىقتالىپ جاتىر.
