قوعامدىق بىرلەستىكتەر مەن ۇكىمەتتىك ەمەس ۇيىمدارعا قازاقستان رەسپۋبليكاسىنىڭ جانە مەملەكەت باسشىسىنىڭ اتىنان مەملەكەتتىك ەمەس ناگرادالارمەن ماراپاتتاۋعا جول بەرىلمەيدى، دەپ حابارلايدى "ادىرنا" ۇلتتىق پورتالى قازاقپاراتقا سىلتەپ.
بۇل تۋرالى ءماجىلىس دەپۋتاتتارىنىڭ ساۋالىنا جاۋاپ بەرگەن پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين مالىمدەدى.
ۆيتسە-پرەمەردىڭ ايتۋىنشا، 2025 جىلى «قازاقستان رەسپۋبليكاسىنىڭ مەملەكەتتىك ناگرادالارى تۋرالى» زاڭنىڭ 42-بابىنا وزگەرىستەر مەن تولىقتىرۋلار ەنگىزىلگەن. اتالعان تۇزەتۋلەرگە سايكەس، قوعامدىق بىرلەستىكتەرگە، قوعامدىق قورلارعا جانە وزگە دە ۇكىمەتتىك ەمەس ۇيىمدارعا سىرتقى ءتۇرى نەمەسە اتاۋى جاعىنان مەملەكەتتىك ناگرادالارعا تولىقتاي نە ءىشىنارا ۇقساس وردەندەر، مەدالدار، ومىراۋعا تاعاتىن بەلگىلەر مەن ولارعا قوسا بەرىلەتىن قۇجاتتاردى تاعايىنداۋعا جانە ازىرلەۋگە تىيىم سالىنادى.
سونداي-اق قازاقستان رەسپۋبليكاسىنىڭ، قازاقستان حالقىنىڭ جانە پرەزيدەنتتىڭ اتىنان مەملەكەتتىك ەمەس ماراپاتتار تاپسىرۋعا جول بەرىلمەيدى.
ءمينيستردىڭ سوزىنشە، قازاقستان رەسپۋبليكاسىنىڭ مادەنيەت جانە اقپارات مينيسترلىگى ەلىمىزدە تىركەلگەن 20 مىڭعا جۋىق قوعامدىق ۇيىمعا تۇراقتى تۇردە تالداۋ جانە مونيتورينگ جۇرگىزىپ كەلەدى.
قازىرگى ۋاقىتتا مينيسترلىك حالىقارالىق تاجىريبەنى، ونىڭ ىشىندە تمد ەلدەرىنىڭ تاجىريبەسىن زەردەلەي وتىرىپ، «قوعامدىق بىرلەستىكتەر تۋرالى» جانە «كوممەرتسيالىق ەمەس ۇيىمدار تۋرالى» زاڭدارعا وزگەرىستەر ەنگىزۋ بويىنشا زاڭ جوباسىن ازىرلەۋدە. جاڭا نورمالار قوعامدىق ۇيىمداردىڭ ماراپاتتارىنا قويىلاتىن تالاپتاردى كۇشەيتۋگە باعىتتالعان.
زاڭ قابىلدانعان جاعدايدا قوعامدىق بىرلەستىكتەر قازاقستان جانە شەتەل ازاماتتارىن تەك ءوز ۇيىمىنا سىڭىرگەن ەڭبەگى ءۇشىن عانا ءوز اتىنان ماراپاتتاي الادى. سونىمەن قاتار قوعامدىق ۇيىمداردىڭ ماراپاتتارىن تىركەۋ ماسەلەسى قازاقستان رەسپۋبليكاسىنىڭ كونستيتۋتسياسى مەن قولدانىستاعى زاڭناماعا سايكەس تىركەلگەن بارلىق قوعامدىق بىرلەستىكتەر جانە كوممەرتسيالىق ەمەس ۇيىمدارمەن تالقىلانباق.
