Qoǧamdyq bırlestıkter men ükımettık emes ūiymdarǧa Qazaqstan Respublikasynyŋ jäne Memleket basşysynyŋ atynan memlekettık emes nagradalarmen marapattauǧa jol berılmeidı, dep habarlaidy "Adyrna" ūlttyq portaly QazAqparatqa sıltep.
Būl turaly mäjılıs deputattarynyŋ saualyna jauap bergen premer-ministrdıŋ orynbasary – ūlttyq ekonomika ministrı Serık Jūmanǧarin mälımdedı.
Vise-premerdıŋ aituynşa, 2025 jyly «Qazaqstan Respublikasynyŋ memlekettık nagradalary turaly» zaŋnyŋ 42-babyna özgerıster men tolyqtyrular engızılgen. Atalǧan tüzetulerge säikes, qoǧamdyq bırlestıkterge, qoǧamdyq qorlarǧa jäne özge de ükımettık emes ūiymdarǧa syrtqy türı nemese atauy jaǧynan memlekettık nagradalarǧa tolyqtai ne ışınara ūqsas ordender, medaldar, omyrauǧa taǧatyn belgıler men olarǧa qosa berıletın qūjattardy taǧaiyndauǧa jäne äzırleuge tyiym salynady.
Sondai-aq Qazaqstan Respublikasynyŋ, Qazaqstan halqynyŋ jäne Prezidenttıŋ atynan memlekettık emes marapattar tapsyruǧa jol berılmeidı.
Ministrdıŋ sözınşe, Qazaqstan Respublikasynyŋ mädeniet jäne aqparat ministrlıgı elımızde tırkelgen 20 myŋǧa juyq qoǧamdyq ūiymǧa tūraqty türde taldau jäne monitoring jürgızıp keledı.
Qazırgı uaqytta ministrlık halyqaralyq täjıribenı, onyŋ ışınde TMD elderınıŋ täjıribesın zerdelei otyryp, «Qoǧamdyq bırlestıkter turaly» jäne «Kommersiialyq emes ūiymdar turaly» zaŋdarǧa özgerıster engızu boiynşa zaŋ jobasyn äzırleude. Jaŋa normalar qoǧamdyq ūiymdardyŋ marapattaryna qoiylatyn talaptardy küşeituge baǧyttalǧan.
Zaŋ qabyldanǧan jaǧdaida qoǧamdyq bırlestıkter Qazaqstan jäne şetel azamattaryn tek öz ūiymyna sıŋırgen eŋbegı üşın ǧana öz atynan marapattai alady. Sonymen qatar qoǧamdyq ūiymdardyŋ marapattaryn tırkeu mäselesı Qazaqstan Respublikasynyŋ Konstitusiiasy men qoldanystaǧy zaŋnamaǧa säikes tırkelgen barlyq qoǧamdyq bırlestıkter jäne kommersiialyq emes ūiymdarmen talqylanbaq.
