ۇلىتاۋ وبلىسىندا ء«بىرتۇتاس ەل – ءبىرتۇتاس جەر» اسكەري-پاتريوتتىق اكتسياسى ءوتتى. قازاقستان رەسپۋبليكاسى قورعانىس مينيسترلىگىنىڭ اقپاراتتىق-ءتۇسىندىرۋ توبى 3 مىڭنان استام ادامنىڭ، ونىڭ ىشىندە مەكتەپ وقۋشىلارى مەن اسكەرگە شاقىرۋ جاسىنداعى ستۋدەنتتەردىڭ قاتىسۋىمەن كەزدەسۋلەر مەن تاقىرىپتىق ءىس-شارالار وتكىزدى.
وڭىردەگى اسكەري ۇجىمدارعا كونستيتۋتسيالىق رەفورما جونىندەگى كوميسسيانىڭ جۇمىسى جانە جالپىحالىقتىق ەرىك ءبىلدىرۋدىڭ ماڭىزى تۋرالى ءتۇسىندىرىلدى.
جەرگىلىكتى اتقارۋشى ورگاندار باسشىلىعى 2030 جىلعا دەيىنگى اسكەري-پاتريوتتىق تاربيە تۇجىرىمداماسىن ىسكە اسىرۋ جانە «جاس سارباز» سىنىپتارىن اشۋ ماسەلەلەرىن تالقىلادى.
جەزقازعان جانە ساتباەۆ قالالارىندا قورعانىس ۆەدومستۆوسىنىڭ وفيتسەرلەرى وقۋ ورىندارى مەن قوسىمشا ءبىلىم بەرۋ مەكەمەلەرىندە ەرلىك ساباقتارىن وتكىزدى. اسكەري ءبىلىم جانە عىلىم دەپارتامەنتىنىڭ وكىلدەرى اسكەري وقۋ ورىندارىنا ءتۇسۋ ءتارتىبىن، اسكەرگە شاقىرۋ شارتتارىن جانە بورىشىن وتەگەن قازاقستاندىقتارعا ارنالعان قولدانىستاعى الەۋمەتتىك كەپىلدىكتەردى ءتۇسىندىردى.
– بۇگىن جاستاردىڭ اسكەري قىزمەتكە قىزىعۋشىلىعىن بايقاپ وتىرمىز. ءبىزدىڭ مىندەتىمىز – ولارعا ارميا مۇمكىندىكتەرى تۋرالى وبەكتيۆتى اقپارات بەرۋ، – دەپ اتاپ ءوتتى پولكوۆنيك داۋلەت بەيسەكوۆ.
جەزقازعانداعى سەرالى قوجامقۇلوۆ اتىنداعى قازاق مۋزىكالىق-دراما تەاترىندا ءىس-شارعا قاتىسۋشىلار مەن العاشقى اسكەري دايىندىق ءپانىنىڭ وقىتۋشىلارىن ماراپاتتاۋ ءراسىمى ءوتتى.
ساتباەۆ قالاسىنداعى شىنبولات دىلدەباەۆ اتىنداعى كەنشىلەر سارايىندا قاراعاندى گارنيزونىنىڭ 44803 اسكەري بولىمىندە مەرزىمدى قىزمەت وتكەرىپ جۇرگەن قاتارداعى جاۋىنگەر سەنىم شاحمانوۆتىڭ بەينەۇندەۋى كورسەتىلدى.
– قىزمەت مىنەزدى شىڭداپ، جاۋاپكەرشىلىككە ۇيرەتەدى. مەن دۇرىس تاڭداۋ جاساعانىما سەنىمدىمىن، – دەدى ۇندەۋىندە سەنىم شاحمانوۆ.
كەزدەسۋلەرگە قر قارۋلى كۇشتەرى ۇلتتىق اسكەري-پاتريوتتىق ورتالىعى ورتالىق ءانسامبلىنىڭ ارتىستەرى جينالعانداردى ونەرىمەن ءسۇيسىنتىپ، تاماشا كوڭىل-كۇي سىيلادى. اسىرەسە پاتريوتتىق جانە اسكەري تاقىرىپتاعى ورىندالعان شىعارمالار اسكەري بولىمدەردىڭ اسكەري قىزمەتشىلەرى مەن ءوڭىر تۇرعىندارىن جىگەرلەندىردى.
