تاراز قالاسىنىڭ №2 سوتى الدىن الا ءسوز بايلاسقان ادامدار توبى جاساعان قورقىتىپ الۋ دەرەگى بويىنشا ءۇش ايىپتالۋشىعا قاتىستى ۇكىم شىعاردى. بۇل تۋرالى جامبىل وبلىستىق سوتىنىڭ ءباسپاسوز قىزمەتى مالىمدەدى، دەپ حابارلايدى “ادىرنا”.
سوت ماتەريالدارىنا سايكەس، وقيعا 2025 جىلدىڭ اقپان ايىندا بولعان. ايىپتالۋشىلار ج.، ا. جانە ك. جابىرلەنۋشى ب.-دان 2,5 ميلليون تەڭگە تالاپ ەتكەن. ولار بۇل سومانى ج.-نىڭ Facebook الەۋمەتتىك جەلىسىندەگى پاراقشاسىندا جاريالانعان جازبالاردى جويۋ ءۇشىن سۇراعان.
اتالعان جازبالاردا جابىرلەنۋشى ديرەكتور بولىپ سانالاتىن سپورت كەشەنى عيماراتىنىڭ كەمشىلىكتەرى كورسەتىلگەن. سونىمەن قاتار، ايىپتالۋشىلار الداعى ۋاقىتتا مۇنداي اقپارات تاراتپاۋ ءۇشىن ا. ەسىمدى ايەلدى جۇمىسقا قايتا قابىلداۋدى جانە كومپلاەنس قىزمەتىنىڭ قىزمەتكەرى گ.-نى جۇمىستان شىعارۋدى تالاپ ەتكەن.
جابىرلەنۋشى ب. قويىلعان تالاپتارعا كەلىسىپ، سوتتالۋشى ك.-عا 2,5 ميلليون تەڭگە مەن ەكى دانا جىلدىق ابونەمەنت بەرگەن.
سوت ۇكىمىمەن ءۇش ايىپتالۋشى دا قىلمىستىق كودەكستىڭ 194-بابى 2-بولىگىنىڭ 2-تارماعى بويىنشا كىنالى دەپ تانىلدى. ج.-عا ءۇش جىلعا باس بوستاندىعىنان ايىرۋ جازاسى تاعايىندالدى. ال ا. مەن ك.-عا ءۇش جىل مەرزىمگە باس بوستاندىعىن شەكتەۋ جازاسى بەلگىلەندى.
ۇكىم ازىرگە زاڭدى كۇشىنە ەنگەن جوق.
