ازەربايجان 2024 جىلدىڭ جەلتوقسانىندا اقتاۋدا AZAL ۇشاعىنىڭ اپاتقا ۇشىراۋىنا قاتىستى ۇستانىمىن وزگەرتپەيدى. بۇل تۋرالى ەلدىڭ سىرتقى ىستەر ءمينيسترى دجەيحۋن بايراموۆ مالىمدەدى، دەپ حابارلايدى «ادىرنا» ءتىلشىسى.
ول قايعىلى وقيعا رەسەيلىك اسكەري قىزمەتكەرلەردىڭ قاتەلىگىنەن بولعانىن اتاپ ءوتتى.
«ۇشاق رەسەي قورعانىس مينيسترلىگىنىڭ قاتەلىگى سالدارىنان قۇلاتىلدى. ءبىز رەسەيلىك تاراپ بارلىق قاجەتتى شارانى قابىلداپ، بولعان وقيعاعا زاڭدىق باعا بەرىپ، وتەماقىلار تولەۋىن كۇتەمىز. ۆلاديمير پۋتين 2025 جىلعى قازان ايىندا ازەربايجان پرەزيدەنتىمەن كەزدەسۋدە ايتقان ۋادەلەرىن ورىنداۋى ءتيىس»،-دەدى ول حودجالى گەنوتسيدىنىڭ 34 جىلدىعىنا ارنالعان «انا داۋىسى» ەسكەرتكىشىن زيارات ەتۋ بارىسىندا.
ەسكە سالايىق، 2024 جىلدىڭ 25 جەلتوقسانىندا ازەربايجان اۋە كومپانياسىنىڭ Embraer 190 جولاۋشى ۇشاعى اقتاۋ ماڭىندا اپاتقا ۇشىراعان بولاتىن. ۇشاقتا بولعان 67 ادامنىڭ 38-ءى قازا تاپتى.
2025 جىلعى 9 قازاندا دۋشانبەدە ازەربايجان پرەزيدەنتى يلحام اليەۆپەن وتكەن كەزدەسۋدە رەسەي پرەزيدەنتى ۆلاديمير پۋتين رەسەيلىك اۋە قورعانىس جۇيەسىنىڭ ىسكە قوسىلعانىن جانە ەكى زىمىران ۇشاققا ءتيىپ، ونى زاقىمداعانىن مويىنداعان. پۋتين رەسەيلىك تاراپ بارلىق ءتيىستى وتەماقىلاردى تولەيتىنىن جانە بارلىق قىزمەتكەرلەردىڭ ارەكەتتەرىنە زاڭدىق باعا بەرىلەتىنىن ۋادە ەتكەن.
