فوتو جي كومەگىمەن جاسالعان
قازاقستان مەن ازەربايجان باكۋ – تبيليسي – جەيھان (بتج) مۇناي قۇبىرى ارقىلى قازاقستاندىق مۇناي تاسىمالداۋ كولەمىن ارتتىرۋدى جوسپارلاپ وتىر، دەپ حابارلايدى "ادىرنا" ءتىلشىسى.
بۇل تۋرالى قازاقستان پرەزيدەنتى قاسىم-جومارت توقاەۆ باكۋدە وتكەن ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ VII سامميتىندە حابارلادى.
مەملەكەت باسشىسىنىڭ ايتۋىنشا، الەمدەگى تۇراقسىز جاعدايعا قاراماستان، قازاقستان سەرىكتەستىكتى نىعايتۋعا جانە ىنتىماقتاستىق اياسىن كەڭەيتۋگە باسىمدىق بەرەدى.
ء«بىز ازەربايجانمەن بىرلەسىپ، باكۋ – تبيليسي – جەيھان قۇبىرى ارقىلى قازاقستاندىق مۇناي جەتكىزۋ كولەمىن ارتتىرۋعا نيەتتىمىز»، – دەدى قاسىم-جومارت توقاەۆ.
پرەزيدەنت بىلتىر قازاقستان، ازەربايجان جانە وزبەكستان اراسىندا «جاسىل» ەنەرگيا جەتكىزۋ سالاسىنداعى ستراتەگيالىق سەرىكتەستىك تۋرالى كەلىسىمگە قول قويىلعانىن ەسكە سالدى. بۇل قۇجات ترانسكاسپي جاسىل ەنەرگيا ءدالىزىن قۇرۋعا نەگىز بولدى.
ەسكە سالساق, قازاقستان كاسپي قۇبىر كونسورتسيۋمى جەلىسى بويىنداعى جۇيەلى تۇراقسىزدىقتى ەسكەرە وتىرىپ، ازەربايجان ارقىلى وتەتىن ترانسكاسپي ترانزيتتىك جۇيەسىنىڭ بولىگى رەتىندە بتج قۇبىرى باعىتىن جانە ىقتيمال باكۋ-سۋپسا قۇبىرىن مۇناي ەكسپورتىنىڭ قوسىمشا باعىتتارى رەتىندە قاراستىرادى. "قازمۇنايگاز" كومپانياسى 2026 جىلى بتج قۇبىرى ارقىلى مۇناي ەكسپورتىن 2025 جىلعى دەڭگەيمەن سالىستىرعاندا 31 پايىزعا ارتتىرىپ، مۇنايدى اۋىستىرىپ تيەۋدى 1,7 ميلليون تونناعا جەتكىزۋدى جوسپارلاپ وتىر.
