«قازاقتەلەكوم» اق باسقارما توراعاسى باعدات مۋسين قازاقستان مەن ازەربايجاندى ترانسكاسپي تالشىقتى-وپتيكالىق بايلانىس جەلىسىنىڭ رەسمي تۇردە ىسكە قوسىلۋىمەن قۇتتىقتادى.
ونىڭ ايتۋىنشا، ەكى ەلدىڭ مەملەكەت باسشىلارى قاسىم-جومارت توقاەۆ پەن يلحام اليەۆ ازەربايجاندىق AzerTelecom كومپانياسىمەن بىرلەسىپ جۇزەگە اسىرىلعان جوبانى ىسكە قوستى. جوبا اياسىندا كاسپي تەڭىزىنىڭ تۇبىمەن ۇزىندىعى 380 شاقىرىم بولاتىن تالشىقتى-وپتيكالىق كابەل تارتىلىپ، ەكى ەل اراسىندا جاڭا حالىقارالىق بايلانىس ارناسى قوسىلدى.
«قازاقستان ءۇشىن بۇل – ازيا مەن ەۋروپا اراسىنداعى ماڭىزدى تسيفرلىق توراپقا اينالۋ جولىنداعى تاعى ءبىر قادام. جاڭا باعىت حالىقارالىق دەرەكتەر ءترانزيتىن دامىتۋعا، ەلىمىزدەگى دەرەكتەر ورتالىقتارى القابىن (Data Center Valley) وركەندەتۋگە جانە ءىرى تەحنولوگيالىق كومپانيالاردى تارتۋعا قوسىمشا مۇمكىندىكتەر اشادى»، – دەپ جازدى باعدات مۋسين Instagram پاراقشاسىندا.
«قازاقتەلەكوم» باسشىسى جوبانى ىسكە اسىرۋعا اتسالىسقان ماماندارعا – ينجەنەرلەرگە، تەڭىزشىلەرگە، سۇڭگۋىرلەرگە، كابەل توسەۋشىلەرگە جانە بىرنەشە اي بويى جاڭا ينفراقۇرىلىمدى قۇرۋعا ەڭبەك سىڭىرگەن بارشا قىزمەتكەرگە ەرەكشە العىسىن ءبىلدىردى.
