«Qazaqtelekom» AQ basqarma töraǧasy Baǧdat Musin Qazaqstan men Äzerbaijandy Transkaspii talşyqty-optikalyq bailanys jelısınıŋ resmi türde ıske qosyluymen qūttyqtady.
Onyŋ aituynşa, ekı eldıŋ memleket basşylary Qasym-Jomart Toqaev pen İlham Äliev äzerbaijandyq AzerTelecom kompaniiasymen bırlesıp jüzege asyrylǧan jobany ıske qosty. Joba aiasynda Kaspii teŋızınıŋ tübımen ūzyndyǧy 380 şaqyrym bolatyn talşyqty-optikalyq kabel tartylyp, ekı el arasynda jaŋa halyqaralyq bailanys arnasy qosyldy.
«Qazaqstan üşın būl – Aziia men Europa arasyndaǧy maŋyzdy sifrlyq torapqa ainalu jolyndaǧy taǧy bır qadam. Jaŋa baǧyt halyqaralyq derekter tranzitın damytuǧa, elımızdegı Derekter ortalyqtary alqabyn (Data Center Valley) örkendetuge jäne ırı tehnologiialyq kompaniialardy tartuǧa qosymşa mümkındıkter aşady», – dep jazdy Baǧdat Musin Instagram paraqşasynda.
«Qazaqtelekom» basşysy jobany ıske asyruǧa atsalysqan mamandarǧa – injenerlerge, teŋızşılerge, süŋguırlerge, kabel töseuşılerge jäne bırneşe ai boiy jaŋa infraqūrylymdy qūruǧa eŋbek sıŋırgen barşa qyzmetkerge erekşe alǧysyn bıldırdı.
