2026 جىلعى 1 ناۋرىزدا XI حالىقارالىق Baiqonyr Film Festival (BFF) كينوفەستيۆالىنە قاتىسۋعا ءوتىنىم قابىلداۋ باستالادى. بارلىق بايقاۋ باعدارلاماسىنا فيلمدەردى 1 شىلدەگە دەيىن تاپسىرۋعا بولادى. فەستيۆال 2026 جىلعى 19–25 قىركۇيەك ارالىعىندا وتەدى.
بيىل فەستيۆال باعدارلاماسى ءتورت باعىتتان تۇرادى:
-
دەبيۋتتىك تولىقمەترلى كوركەمسۋرەتتى فيلمدەردىڭ حالىقارالىق بايقاۋى
-
حالىقارالىق قىسقامەترلى فيلمدەر بايقاۋى
-
ۇلتتىق قىسقامەترلى فيلمدەر بايقاۋى
-
Baiqonyr Pitching (ستسەناريلەر بايقاۋى)
فيلمدەر تۇپنۇسقا تىلدە، اعىلشىن تىلىندەگى سۋبتيترمەن قابىلدانادى.
قاتىسۋشىلارعا جاس شەكتەۋى جوق. بايقاۋعا 2025–2026 جىلدارى تۇسىرىلگەن جانە بۇعان دەيىن Baiqonyr-عا ۇسىنىلماعان جۇمىستار قابىلدانادى. قىسقامەترلى فيلمدەر بايقاۋىنا ۇزاقتىعى 30 مينۋتقا دەيىنگى تۋىندىلار قابىلدانادى. سونداي-اق ءبىر اۆتوردان نەمەسە ستسەناريستەر توبىنان بەرىلەتىن ءوتىنىم سانىنا شەكتەۋ جوق.
«2026 جىلى فەستيۆال اياسىن كەڭەيتىپ، ەۋرازيا ەلدەرىنەن دە ءوتىنىم قابىلدايمىز. بۇل فەستيۆالدىڭ حالىقارالىق اۋقىمىن ەداۋىر ۇلعايتادى»، – دەپ اتاپ ءوتتى فەستيۆالدىڭ نەگىزىن قالاۋشى ءارى پرەزيدەنتى انۋار كەنجيباەۆ.
سونداي-اق، بيىل Baiqonyr Pitching بايقاۋى قايتا ورالدى. بۇل جوبا جاس اۆتورلارعا ءوز يدەياسىن ستسەناريدەن دايىن فيلمگە دەيىن جەتكىزۋگە مۇمكىندىك بەرەدى. قاتىسۋشىلار مەنتورلاردان كەڭەس الىپ، پروديۋسەرلىك قولداۋعا يە بولادى، سونداي-اق سالاداعى رەسۋرستارعا قول جەتكىزەدى. پيتچينگ كۋراتورى – تانىمال پروديۋسەر اسەل ەرجانوۆا. Pitching Day 21 قىركۇيەككە جوسپارلانعان.
فەستيۆالدىڭ تولىق باعدارلاماسى مەن كۇنتىزبەسى ارنايى پرەزەنتاتسيادا جاريالانعان.
ايتا كەتسەك، بىلتىر فەستيۆال 10 جىلدىق مەرەيتويىن اتاپ ءوتتى. حالىقارالىق بايقاۋعا 865 ءوتىنىم، ۇلتتىق بايقاۋعا 171 ءوتىنىم كەلىپ ءتۇستى. بۇل كورسەتكىش فەستيۆالگە دەگەن قىزىعۋشىلىق جىل سايىن ارتىپ كەلە جاتقانىن جانە ونىڭ كينوەكسپەريمەنتتەرگە ارنالعان ماڭىزدى الاڭعا اينالعانىن كورسەتەدى.
فەستيۆال 2020 جىلدان بەرى تمد-عا قاتىسۋشى مەملەكەتتەردىڭ مەملەكەتارالىق گۋمانيتارلىق ىنتىماقتاستىعى قورىنىڭ قولداۋىمەن وتكىزىلىپ كەلەدى.
فيلمدەردى FilmFreeway پلاتفورماسى ارقىلى جىبەرۋگە بولادى.
فەستيۆال جاڭالىقتارىن baiqonyr.kz رەسمي سايتىنان جانە Instagram پاراقشاسىنان باقىلاپ وتىرىڭىز.
