اتىراۋ ماڭىندا جوعالىپ كەتكەن جانگەلدين اۋىلىنىڭ تۇرعىندارىنا قاتىستى قايعىلى وقيعاعا بايلانىستى جاڭا دەرەكتەر بەلگىلى بولدى، دەپ حابارلايدى "ادىرنا".
ىزدەستىرۋ بارىسىندا وتباسىنىڭ تاعى ەكى مۇشەسى – ناۋرىز بەن ميرامگۇلدىڭ مايىتتەرى تابىلدى. وسىلايشا اتالعان وتباسىنىڭ بارلىق مۇشەلەرىنىڭ دەنەسى انىقتالعان.
دەرەككوزدەردىڭ مالىمەتىنشە، ولار دا قازا تاۋىپ، گەولوگ ىقشاماۋدانىندا ورنالاسقان ءۇيدىڭ اۋلاسىنا جاسىرىن كومىلگەن. بۇل ءۇيدى كۇدىكتى بۇرىن ايەلىمەن بىرگە ۋاقىتشا جالداپ تۇرعانى ايتىلىپ وتىر.
الدىن الا اقپارات بويىنشا، اتالعان قىلمىسقا سۇلتان سارسەماليەۆ كۇدىكتى رەتىندە قاراستىرىلىپ جاتىر. قازىر وقيعانىڭ بارلىق ءمان-جايىن انىقتاۋ ءۇشىن تەرگەۋ امالدارى جالعاستى.
ەسكە سالساق، اتىراۋ وبلىسى جانگەلدين اۋىلىندا تۇراتىن وتباسى 2025 جىلدىڭ سوڭىنا بەلگىسىز جاعدايدا جوعالىپ كەتكەن ەدى.
6 قاڭتاردا اتىراۋ وبلىسى اۋماعىنان جوعالعان وتباسىنىڭ ەكى مۇشەسىنىڭ — ماقسوت قارابالين مەن ونىڭ جۇبايى ءناسىپ وتەشقاليەۆانىڭ دەنەسى سارايدان تابىلدى.
9 قاڭتاردا اتىراۋ وبلىسىندا وتباسى مۇشەلەرىن ءولتىردى دەگەن كۇدىككە ىلىنگەن مارقۇمداردىڭ كۇيەۋ بالاسى سۇلتان سارسەماليەۆ ەكەنى رەسمي تۇردە انىقتالعان.
سونىمەن قاتار، اتىراۋدا اتا-ەنەسىن ءولتىردى دەگەن كۇدىكتى يندونەزيادا ۇستالعانى ءمالىم بولعان ەدى.
