قىتاي بيلىگى يراننىڭ ىشكى ساياسي پروتسەستەرىنە سىرتقى كۇشتەردىڭ ارالاسۋىنا قارسى ەكەنىن مالىمدەدى. بۇل تۋرالى 9 ناۋرىزدا قىتاي سىرتقى ىستەر مينيسترلىگىنىڭ وكىلى گو تسزياكۋن ءباسپاسوز كونفەرەنتسياسىندا ايتتى، دەپ حابارلايدى “ادىرنا”.
ونىڭ سوزىنشە، قىتاي كەز كەلگەن ەلدىڭ ىشكى ىستەرىنە ارالاسۋدى قولدامايدى جانە مەملەكەتتەردىڭ ەگەمەندىگى مەن اۋماقتىق تۇتاستىعى قۇرمەتتەلۋى ءتيىس.
«قىتاي قانداي دا ءبىر سىلتاۋمەن باسقا مەملەكەتتەردىڭ ىشكى ىستەرىنە ارالاسۋعا قارسى. يراننىڭ ەگەمەندىگى، قاۋىپسىزدىگى جانە اۋماقتىق تۇتاستىعى قۇرمەتتەلۋى قاجەت»، – دەدى ول.
بۇل مالىمدەمە مودجتابا حامەنەيدىڭ يراننىڭ جاڭا جوعارعى كوشباسشىسى بولىپ تاعايىندالۋىنا بايلانىستى ايتىلعان پىكىرلەر مەن قاۋىپتەرگە جاۋاپ رەتىندە جاسالدى. قىتاي تاراپى بۇل شەشىمنىڭ يراننىڭ ءوز كونستيتۋتسياسىنا سايكەس قابىلدانعانىن اتاپ ءوتتى.
سونداي-اق قىتاي يراننىڭ ىشكى ساياسي جۇيەسىنە قاتىستى بارلىق شەشىمدەردى ەلدىڭ ءوزى قابىلداۋى ءتيىس ەكەنىن جەتكىزدى. رەسمي بەيجىڭ حالىقارالىق قاۋىمداستىقتى يراننىڭ تاۋەلسىزدىگىن جانە مەملەكەتتىك ەگەمەندىگىن قۇرمەتتەۋگە شاقىردى.
بۇدان الدىن Fox News تەلەارناسىناسىنداعى سۇحباتىندا اقش باسشىسى ترامپ مودجتابا حامەنەيدىڭ اكەسىنىڭ ورنىنا تاعايىندلعانى تۋرالى «مەنىڭ بۇعان كوڭىلىم تولمايدى» دەپ مالىمدەگەن. ايتا كەتەيىك، بۇعان دەيىن دە ترامپ مودجتابا حامەنەي يراننىڭ جوعارعى كوشباسشىسى بولۋى مۇمكىن دەگەن ىقتيمالدىقتى سىنعا الىپ، مۇنداي شەشىمدى «قابىلداۋعا بولمايدى» دەپ اتاعان.
ال يراندى كۇندە زىمىرانمەن تومپەشتەپ جاتقان يزرايل يراننىڭ جاڭا جەتەكشىسى بۇرىنعى جولدى ۇستاناتىن بولسا، "اڭديتىنىن" ايتقان. ۇلكەن حامەنەي يزرايل مەن باتىسقا قارسى ىمىراسىز قاتاڭ باعىت ۇستانعان ساياساتكەر بولدى. ۇلى مودجتابانىڭ دا اكە جولىن جالعاستىراتىنى، قاتاڭ ۇستانىمداعى تۇلعا ەكەنى ايتىلادى.
