Qytai bilıgı İrannyŋ ışkı saiasi prosesterıne syrtqy küşterdıŋ aralasuyna qarsy ekenın mälımdedı. Būl turaly 9 nauryzda Qytai Syrtqy ıster ministrlıgınıŋ ökılı Go Sziakun baspasöz konferensiiasynda aitty, dep habarlaidy “Adyrna”.
Onyŋ sözınşe, Qytai kez kelgen eldıŋ ışkı ısterıne aralasudy qoldamaidy jäne memleketterdıŋ egemendıgı men aumaqtyq tūtastyǧy qūrmetteluı tiıs.
«Qytai qandai da bır syltaumen basqa memleketterdıŋ ışkı ısterıne aralasuǧa qarsy. İrannyŋ egemendıgı, qauıpsızdıgı jäne aumaqtyq tūtastyǧy qūrmetteluı qajet», – dedı ol.
Būl mälımdeme Modjtaba Hameneidıŋ İrannyŋ jaŋa Joǧarǧy köşbasşysy bolyp taǧaiyndaluyna bailanysty aitylǧan pıkırler men qauıpterge jauap retınde jasaldy. Qytai tarapy būl şeşımnıŋ İrannyŋ öz Konstitusiiasyna säikes qabyldanǧanyn atap öttı.
Sondai-aq Qytai İrannyŋ ışkı saiasi jüiesıne qatysty barlyq şeşımderdı eldıŋ özı qabyldauy tiıs ekenın jetkızdı. Resmi Beijıŋ halyqaralyq qauymdastyqty İrannyŋ täuelsızdıgın jäne memlekettık egemendıgın qūrmetteuge şaqyrdy.
Būdan aldyn Fox News telearnasynasyndaǧy sūhbatynda AQŞ basşysy Tramp Modjtaba Hameneidıŋ äkesınıŋ ornyna taǧaiyndlǧany turaly «menıŋ būǧan köŋılım tolmaidy» dep mälımdegen. Aita keteiık, būǧan deiın de Tramp Modjtaba Hamenei İrannyŋ joǧarǧy köşbasşysy boluy mümkın degen yqtimaldyqty synǧa alyp, mūndai şeşımdı «qabyldauǧa bolmaidy» dep ataǧan.
Al İrandy künde zymyranmen tömpeştep jatqan İzrail İrannyŋ jaŋa jetekşısı būrynǧy joldy ūstanatyn bolsa, "aŋditynyn" aitqan. Ülken Hamenei İzrail men batysqa qarsy ymyrasyz qataŋ baǧyt ūstanǧan saiasatker boldy. Ūly Modjtabanyŋ da äke jolyn jalǧastyratyny, qataŋ ūstanymdaǧy tūlǧa ekenı aitylady.
