مەملەكەت باسشىسى قاسىم-جومارت توقاەۆ يران اۋماعىنان بىرىككەن اراب امىرلىكتەرىن زىمىراندارمەن جانە ۇشقىشسىز ۇشۋ اپپاراتتارىمەن شابۋىلداۋ ارەكەتتەرىن ايىپتادى. بۇل تۋرالى پرەزيدەنت كەڭەسشىسى – ءباسپاسوز حاتشىسى ايبەك سمادياروۆ جاريالادى، دەپ حابارلايدى "ادىرنا".
"سونىڭ سالدارىنان كوپتەگەن تۇرعىن قازا تاۋىپ، ازاماتتىق ينفراقۇرىلىمعا نۇقسان كەلدى. مەملەكەت باسشىسى تاياۋ شىعىستاعى قارۋلى قاقتىعىستى ودان ءارى ۋشىقتىراتىن مۇنداي ارەكەتتەردى ەش اقتاۋعا بولمايدى دەپ سانايدى. قاسىم-جومارت توقاەۆ حالىقارالىق داۋلى ماسەلەلەردى شەشۋدىڭ ەڭ دۇرىس جولى ديپلوماتيالىق تاسىلدەرگە جۇگىنۋ ەكەنىن اتاپ ءوتتى", - دەپ جازدى ايبەك سمادياروۆ.
بۇدان الدىن قازاقستان باسشىسى يراننىڭ ازەربايجانعا سوققىسىن دا قاتاڭ ايىپتاعان. ودان كەيىن قازاقستان پرەزيدەنتى قاسىم-جومارت توقاەۆ يران پرەزيدەنتى ماسۋد پەزەشكياننىڭ كورشى ەلدەرگە شابۋىل جاساماۋ تۋرالى مالىمدەمەسىن قۇپتاعان بولاتىن. قازاقستان پرەزيدەنتىنىڭ بۇل شەشىمدى تاياۋ شىعىستاعى شيەلەنىستى باسەڭدەتۋگە باعىتتالعان ماڭىزدى قادام دەپ سانايتىنى ايتىلعان. الايدا يران باسشىسىنىڭ مالىمدەمەسىنە قاراماستان ايماق ەلدەرىن تەگەران جاعىنان نىساناعا الۋ ءالى توقتاماي تۇر. يرانداعى اسكەري ارەكەت 28 اقپان كۇنى يزرايل مەن اقش-تىڭ بىرىككەن سوققىسىنان كەيىن باستالدى. يران سوڭىنان اقش-تىڭ اسكەري بازالارى ورنالاسقان ەلدەردەگى امەريكا مۇددەسىن كوزدەيتىن نىسانداردى اتقىلاۋ باستادى. الايدا ەكى جاقتىڭ اتىسىنان ورتادا بەيبىت تۇرعىندار، سونىڭ ىشىندە جاس بالالار قازا تاپقان.
