فوتو: sauda.e-qazyna.kz
قازاقستاندا ۇقك شەكارا قىزمەتىنىڭ قىزمەتتەن شىققان يتتەرى اۋكتسيونعا قويىلىپ، ساتىپ الۋشىلار تاراپىنان جوعارى سۇرانىسقا يە بولدى. جۋىردا وتكەن ساۋدادا 26 نەمىس، بەلگيالىق جانە شىعىس ەۋروپالىق تۇقىمدى يت ساتىلىپ، ولاردىڭ باعاسى باستاپقىدان بىرنەشە ەسە جوعارى بولعان، دەپ حابارلايدى "ادىرنا".
ۇقك قىزمەتىنەن زەينەتكە شىققان يتتەر بۇرىن قوستاناي، الماتى، ماڭعىستاۋ، تۇركىستان جانە جامبىل وبلىستارىندا قىزمەت اتقارعان. يتتەردىڭ باستاپقى باعاسى 935 تەڭگەدەن 11,5 مىڭ تەڭگەگە دەيىن بولعان، الايدا كەيبىرەۋىنىڭ باعاسى 30 ەسە وسكەن.
مىسالى، ەكى بەلگيالىق توبەت – مانچي مەن مارچەس – باستاپقى 5,4 مىڭ تەڭگەدەن 152,8 مىڭ تەڭگەگە دەيىن ساتىلدى. ال التى قىزمەتتىك يت – مايك، مايلو، ميگ، مەل، مانسۋر جانە مايس – باستاپقى 11,5 مىڭ تەڭگەدەن 77,7 مىڭ تەڭگەگە باعالانعان.
فوتو: sauda.e-qazyna.kz
ۇقك توبەتتەرىن اۋكتسيونعا شىعارۋ بيىل اقپان ايىنان باستالعان. العاشقى كەزدە قوستاناي وبلىسى شەكارا قىزمەتىنىڭ التى تۇقىمدى ءيتىن باستاپقى باعامەن ساتىپ العان، بىراق كەيىن كەيبىر يتتەردىڭ باعاسى 3–7 ەسە وسكەن.
سايتتاعى اۋكتسيوندا قىزمەتتەن شىققان وۆچاركالاردىڭ ءجيى كورىنۋى قازاقستاندىقتار اراسىندا الەۋمەتتىك جەلىلەردە پىكىرتالاس تۋعىزعان. بۇل جاعداي يتتەردىڭ باعاسىنىڭ ءوسۋى مەن ولاردىڭ نارىقتاعى سۇرانىسىنىڭ ارتۋىنا بايلانىستى ەكەنى اتاپ وتىلگەن.
